!وليكن آخرها ..صوره

بحب الحياه بحب الناس - محمود سعودي

كل سنه و انتو طيبين يا بني آدمين
كل سنه و انا بحبكم اوي اوي اوي
كل سنه و دايماً احلامنا بنحقهها
كل سنه و احنا عايشين في سعاده
و ايجابيه

موضوع المره دي غير اي موضوع
هي فكرتي على العموم..ان آخر موضوع يتعمل في المدونه في العام ده يكون صوره
سواء اجمل صوره انت شقتها او صورتها

و دي من اجمل الصور اللي انا صورتها لطفل في السعوديه

الحقيقه..انا لما دققت في الصوره...بعد لما صورتها بكتير..لقيت فيها معاني
شايفين في ظهر الطفل...اتنين كبار...منهم من شاب شعره....و هو بالتأكيد مستقبل الطفل ده بعد سنوات
لكن الطفل اعطى ظهره لهذا المستقبل....و ابتسم الى الكاميرا
وكأن لسان حاله يقول
بحب الحياه...هاستمتع بيها....لحظه بلحظه

انا كمان بحب الحياه و بحب الناس و بموت فيهم

يا ريت كلنا نعيش لحظتنا و نركز فيها بس

وما نحملش هم بكره..طالما لسه في النهارده

يا رب يكون الموضوع عجبكم
و يا ريت اي حد عنده مدونه...يشارك معايا..وكأنها حمله

كل سنه و انتم طيبين..و ان شاء الله العام الجديد..يكون في ظهور أحسن ليا على المدونه

كلام عن شخصيات غير متوقعه
كلام كبير
كلام في الحب و الرومانسيه
خليك طبيب نفسك
انتظروني...قريباً
بحبكم...بحبكم اوي

باي باي 2007

! مجرد اطلاله

بحب الحياه بحب الناس - محمود سعودي

ثمة شئ في صدري يؤرقني...افسد على كل لحظات المتعه، ضاق به صدري و بدورها كانت حياتي على غراره

خرجت من بيتي اهيم على وجهي ابحث في الشوراع عن ملجأ التمس منه راحة ..لم اجد

كنت آمل ان تراني عيون فتاة مدللة فيقفز قلبي فرحاً لإهتمام غير معهود

أو أراقب قطرات ماء تتساقط برشاقه من السماء على اطراف ورق الاشجار فتتناثر بقاياها على وجهي و أحس ببردها

ولكن ما أصبت من ذلك شيئاً

رجعت الى بيتي حزيناً...أوكما انا ، فما كان من فرق

ظننت ان السجن في بيتي وما كان الظن في محله

اغمضت عيني...و أملت رأسي على الحائط و على وجهي طبقه من نور شمس طلت من شرفتي ايقظتني

!لم اكن نائماً..ولكنها ايقظتني من داخلي.....اخترق شعاعها صدري ليطلعني على ما بداخله فاذا السجن داخل صدري لا في البيت

مددت يداً كانت خائبه في يوم الى داخلي وامسكت به بقبضه من حديد واستخرجته من بين ضلوعي وسط آهات الألم و الفرح معاً

استخرجته و نظرت اليه في عجب....ثم استندت اليه بظهري فلمست راحة لم اعهدها على فراشة قطن أو ديباجة حرير

فإلتفت اليه في عجب و دهشه....و قلت مبتسماً بل ضاحكاً

تلك هي الدنيا..فيها تتخذ من نفس مواطن ألمك و عذابك ، مواطن أخري للراحة و التأمل

! خواطري....ابكي ، لعجزي عن البكاء

بحب الحياه بحب الناس - محمود سعودي

لقد عجزت عن الوصول اليها....بل انه قد ارهقني البحث عنها في داخلي ..ترى هل هي نهاية الاحزان؟ بالطبع لا ، و ان كان دافعي لكتابة هذا هو حزن و ألم عميق في نفسي
ترى هل فقدت الاحساس؟ لا اعتقد..و ان كنت استجيب للظروف و ابتسم و اضحك و اغضب.
أم هي لا مبالاه ؟؟ لا أعرف .... أين دموعي اذاً ؟؟؟؟؟
قد يكون هذا من جفاف نهر الدموع من داخلي ، هل جفت الدموع بالفعل ؟ ام هي نهاية الاحزان؟
و اذا كان البعض يبكي من الفرحه.... فهل هي نهاية الفرح ايضاً؟؟؟
الى اين السبيل؟؟؟ من اين آتي بالدموع اذاً ؟
يراودني احساس بأني جدار من الحجاره دونها ...أخذت ابحث في داخلي عنها فقلت اذهب الى قلبي مباشرة فهو خير دليل
وما ان وصلت اليه، حتى توقفت عن الرؤيه ولا استطيع ان ارى المزيد ...ما هذا؟ هل فقدت البصر؟
لا اعتقد فبمجرد ان التفت خلفي حتى وجدت شعاعاً من النور يأتي من الخارج حيث الناس و الدنيا
و ما ان التفت الى قلبي حتى تعطلت الرؤيه من جديد.....اذاً هو الظلام...نعم هو ظلام حال بيني و بين رؤية قلبي مجدداً ، سألت قلبي ماذا بك؟ و ما سر هذا الظلام؟ لم يجيب
كررت سؤالي....و ما من مجيب ، صرخت به....ولم يرد.......اقتربت منه اكثر...فوجدته ميتاً

يا للحسرة...مات قلبي ، اذاً انا ميت ، بالفعل
آآآآآآآآآه ...كنت اعيش في وهم كبير و بينما انا انعي نفسي حتى قاطعني العزاء...عزاء من عيوني....تعزيني الدموع
فقد انهمرت دموعي حزناً و ألماً على موت قلبي ...كانت دموعاً حاره ...وما ان سالت الدموع على وجنتاي و سالت على صدري، حتى ارتجف قلبي من حرارتها ..و نبض من جديد.. حيث عادت له الحياه بعد ان كان ميتاً...و سبب موته و حياته.......دموعي!

العيد فرحه...مااااااااااااء

بحب الحياه بحب الناس - محمود سعودي

" كل ثنه و انتم طيبين و كويثين و بثحه و ثعاده بمناثبه العيد"

كل سنه و انتم طيبين يا بني آدمين

بمناسبه عيد الخروف

و كل لحمه و انتم شبعانين

بحبكم

خلاص يا ناااااس...ربنا اعلن استقالته !!!!؟

بحب الحياه بحب الناس - محمود سعودي

ليتها كانت نهايه الدنيا......علها تكون قريباً قبل ان اسمع المزيد

هاهي الكائنه التي تدعى نوال السعداوي تطل علينا من جديد بعمل حقير " واطي " مستفز

تتحكم فيه في كل شئ... حتى اتتها الجرأه في قلبها الذي لا أعلم له حقيقه و يحول الشك بيني و بين وجوده لديها أن تتكرم على " الله " سبحانه و تعالى و تعطي له دوراً في مسرحيه قذره !؟

ذلك العمل الذي اطلقت عليه " الاله يعلن استقالته في اجتماع القمه"....و الذي شبهت فيه الذات الالاهيه المقدسه بالرجل العجوز ذو الستين من العمر و الذي كان لا يتحرك مطلقاً و يرتدي ملابس الملوك و من حوله الجنود و بجانبه انهار الخمر..و شبهت ابليس بشاب وسيم في الثلاثين...و بأن رضوان عليه السلام خازن الجنه - و التي ان شاء الله مش هتورد على ريحتها- بأنه السكرتير الخاص بالذات الالاهيه... الى جانب السب العلني المباشر الذي لحق بسادتنا من الملائكه و الانبياء دون أي رموز

ستوب يا كفر

هو في ايه...هو ايه مصبرنا...مستنيين لما يكون في اكتر من مثال من هذه النوال ؟ ولا منتظرين يكون السب علني؟

و هو في علنيه أكتر من كده؟؟؟؟؟؟

المفروض دي تعدم..دي بتسئ لربنا يا جدعان...لربنا...لربنا؟؟؟؟

يا نهار اسود....يعني خلاص مفيش أي عقل....و فين دورنا...أقل واجب يكون موقفنا زي مدبولي صاحب دار النشر اللي اصدرت الكتاب ده و اللي اعدم جميع الكتب قبل ان تنشر و قال مش مهم اتكلف كام ...المهم ما اغضبش ربنا

نفسي كل مصر تكون مدبولي.....و تحرق أي حاجه تتعلق بالنوال دي

بس في النهايه كله بأمر الله...و اكيد الوقفه هتكون قريب...و قدام عينينا و ربنا يثبتنا و ننصر دينا و ننصر ربنا و ندافع عنه لحد اخر نفس

هي ايه حكايتي مع المقابر؟؟

بحب الحياه بحب الناس - محمود سعودي

انا مش عارف مالي في ايه؟.....بقالي فتره كده كاره حاجات كتير في الحياه و ناقم و حاسس بالسلبيه بتجر فيا

هو كل الناس كده؟..ولا الدنيا اللي اتغيرت؟.....ولا انا عندي مشكله و أنا مش حاسس بيها؟

أنا بقالي فتره ..حتى مش عارف ان كانت كبيره ولا صغيره...برتاح نفسياً لما بادخل المقابر أو اتفرج عليها في أي طريق أو اشوفها و خلاص..حتى لما كنت في السعوديه حسيت بحاجه كده غريبه لما دخلت مدافن البقيع بد بجد انا نفسي ارجع السعوديه تاني و اقضي فتره هناك في مدافن البقيع

انا حتى عارف عدد المدافن اللي بعدي من عليها و انا رايح الكليه بالعربيه كل يوم

و ليه المقابر بالذات ...دي مفيش فيها أي صوره من صور الحياه اللي انا بحبها

هل يمكن علشان هاكون متأكد ان مفيش فيها حد بيخدع حد..و محدش بيداري ورا ظهروا و بالتأكيد كل الناس اللي فيها ميتين و محدش بيتظاهر انه ميت؟

هل يمكن لأن المكان ده خالي من عادات البشر السيئه؟

هل يمكن لأن انا اتغيرت و بقيت مش بحب الحياه؟

ولا...في حاجه هتحصل؟

ولا دي علامه ان انا قلبي خلاص مات...و المفروض ان انا اراجع نفسي لأن مفيش حد بيستريح في المكان ده ..و ده مكان للاتعاظ فقط و ده دليل على ان انا في ف قلبي مشكله؟

طب هو انا لوحدي كده؟....ولا في حد زيي كده؟

طب سؤال.......هو أنا طبيعي؟

قريب،، قريبا،، عن قرب ....بس قول ان شاء الله

بحب الحياه بحب الناس - محمود سعودي

قريباً ان شاء الله

في شكل جديد...و حركات جديده و .....كله جديد ف جديد

انتظروا

في ........؟

في كلام أطفال مايقولهوش الا الكبار

يا ترى هو اييييييييييييه؟؟؟؟

سؤال و ليس اعتراض ....ولم الحساب اذاً؟؟؟

بحب الحياه بحب الناس - محمود سعودي

سؤال يراودني منذ صغري و الى الآن
لا أعلم له اجابه...بل يرهقني التفكير فيه حتى اجدني امام المئات من علامات الاستفهام التي لا حصر لها
لماذا يحاسبنا الله يوم القيامه مع ان كل شئ يفعله العبد يكون مكتوباً و معلوماً و قد قدره الله له و هو في بطن امه؟؟؟؟
السؤال، بل القضيه هنا تتعلق بكون الانسان مسير أم مخير

هو يعني ايه مسير و يعني ايه مخير؟؟؟؟؟

و ازاي انا مسير أو مخير؟؟؟؟

أم ان المعاصي تكون غير مكتوبه..و حينما يعصي العبد يعاقب على ذلك؟؟؟؟

بجد مش عارف

يعني ببساطه

الواحد لما يسرق ، مش هو كان مكتوب في صحيفة اعماله عند ولادته أنه سيسرق في يوم كذا؟
طب كيف يدخله الله النار و هو كان مكتوب له هذا؟؟؟؟؟؟؟

الناس الصالحه كلها اللي بتعمل خير، مش ربنا كان كاتب لها انها هتعمل اعمال خير في الايام الفلانيه؟
طب علام يدخلهم الله الجنه و هم كان مكتوب لهم هذا؟؟؟؟؟؟

انا لما بفكر دايماً في الحكايه دي بحس ان انا تايه...حاسس ان في شئ غامض

اصله مش معقوله يكون حد بيعمل حاجه ربنا -سبحانه و تعالى- مش عارفها و بعدين ربنا- عز و جل- عاقبه على معصيته..ده خارج نطاق العقل اساساً
ولا احنا مالناش لزمه في الدنيا دي...بمعنى ان كل ما حدث و يحدث و سوف يحدث كان قد قدر و ها هو الآن يٌعرض؟؟؟؟؟؟؟؟
انا بس محتاج أعرف فين فرصة الطاعه و المعصيه؟؟؟؟
حد عنده جواب......حد يقنعني؟

سؤال غلس..سخيف..و رخم تسمحلي اخنقك؟

بحب الحياه بحب الناس-محمود سعودي

يمكن يكون بوست مالوش لزمه،لكن هاكتبه ..الى معشر المدونين

يمكن اكون فهمت الموضوع غلط طيب

او اكون غلطان يمكن..محدش عارف

هاسأل سؤال...لو حد خنق عليك ف المدونه هتعمل ايه

اكيد هنقابل ناس معانا و ناس محايده و ناس مش عاجبها اسلوبنا
و لكن ..ماذا بعد تلك المقابله

نمشي ازاي؟.....هتكمل في طريقك؟..ولا ترضيهم؟

و هل المطلوب مني في المدونه اني ارضي الناس؟ ،و لا اعبر عن نفسي؟

لازم اكتب باللغه العربيه الفصحى و اراعي ما يراعيه الاخرون في نشرات الاخبار و اللقاءات الرسميه؟

المطلوب مني اني ما اهزرش؟.. و اشوف كل واحد عاجبه ايه و اعمله ولو فيه حاجه مش عاجباه اشيلها؟؟؟؟

سؤال كمان.....و ده زي ما اتهمني احدهم في البوست اللي فات و شوفوه في التعليقات

لازم يكون اسلوبي غايه في الرسميه و مفردات اللغه تكون فصحي خالصه؟ لازم اتكلم في المدونه زي ما باتكلم مع حد كبير

م الاخـــر

لو حد مش عاجبه مدونتك...هاتتجاهله و تكمل في طريقك و تعبر عن نفسك؟...ولا هاتشتمه و تقول له انت مالك ..كده وش؟

هاتقول له مالكش دعوه ..بالذوق؟...هاتحاول تعمل معاه حوار و تتوصل لحل و تغير من اتجاه مدونتك و تغير من اسلوبك و ترضيه ..و بعدين تغيرعلشان ترضي واحد غيره؟؟؟؟

طيب هي المدونه معموله ليه اساساً...عشان تتخنق فيها؟..ولا علشان تفضفض؟

يمكن اكون مش محتاج اجابات...بس نفسي الناس اللي بتعلق تكون تعليقاتها ايجابيه و عارفه هي بتقول ايه

يمكن أكون محتاج اعرف يعني ايه مدونه

وبالاحري يجب ان يعلمها قبلي اصحاب التعليقات السخيفه.... الذين لا اعبأ بهم

شكراً

بحبكم

صباحوووووووو 2

بحب الحياه بحب الناس - محمود سعودي

هاي..ازيكو

وحشتوني جدا جدا جدا

انا كنت متوقف لفتره علشان كان عندي امتحانات كتير

ياللا محدش واخد منها حاااااااااااااااجه

المهم

دي صوره كده من تصويري ع الماشي

اكيد طبعا لا تعليق...لأ غلاسه بقى في تعليق

كلمه الصحراوي مكتوبه الصحرواي

فكرت..اللي كتب الكلمه دي كده مش راجل اهبل يعني ولا مؤاخذه

وبعد طول البحث و التفحيص و التمحيص

وجدت في اللغه الانجليزيه كلمه في غاية الروعه

ان واي على وزن

WAY

طريق يعني

شكلك فاهم يا نصه

الراجل مش بيهزر يا جدعان...صحرواي يعني الطريق الصحراوي .....يخرب بيت جهلكم

حسبي الله و نعم الوكييييييييييييييييييييييييييييييييييييل

اخيرا...حان كشف الستار عن،، رحلتي

كنت وعدتكم من فتره عن رحلتي لعالم الغموض و قلت اني هاكون معاكم هنا و احكيلكم عن رحلتي و اللي شفته
و بالفعل

كانت على صفحات مجلتي الحبييه مجلة كلمتنا.......رحلتي

بحب الحياه بحب الناس - تحرير محمود سعودي و ندا ثاقب

كانت رحلتنا الى مقابر السيده النفيسه....و كانت و جهتنا سكانها

سكانها الاحياء و ليس الاموات...نعم...فهناك احياء و لكنهم في عداد الموتى

اناس تركوا الحياه مع البشر و فضلوا عليهم جيراناً من الاموات
عاشوا حياة بسيطه قد تعتبرها حياه تحت التراب...أو انهم مدفونون فوق التراب

قابلنا كتير ...بس ده من اهم اللقاءات

اسمي صباح
دول اولادي 4 أولاد و 2 بنات و احنا هنا من 11 سنه كنت عايشه في عزبه "أبو قرن" و انفصلت عن زوجي و جينا هنا عن طريق والدي ، هو يعرف صاحب المقبره و خلانا نسكن هنا من غير مقابل
لكن طليقها هو اللي بيصرف على الأولد حالياً.
كان واحد من أولادها قاعد جنبي ...إسمي عبد الله ... نفسي اكون ظابط أو محامي
أيوه احنا مش عايشين بحريه ..في شباب "ولاد حرام" بيتهجموا على البيت و عايزين "فِرده" فلوس يعني لكن احنا بنتخانق معاهم و مش بنديهم حاجه
غير كده المكان أمان و مفيش عفاريت ولا اي حاجه من دي انا حتى ممكن انزل التربه لما تكون مفتوحه و مش بخاف و هنا لحد الفجر بيكون في حركه و بنكون قاعدين كمان
انما الترب القديمه ماتعرفش تمشي هناك الساعه 2 الظهر انا بنتي اتخطفت هناك و كان شاب عايز يغتصبها لكن ربنا نجاها و و احده شافته فسابها و هرب ، وبعتت واحده جابتها لحد هنا.

جاءت جارتها قعدت معانا و اتكلمت معاها شويه
اسمي رشا هنا من خمس سنين لما اتجوزت وجيت هنا علشان اعيش مع زوجي و تركت بيتي و شغلي في الإسماعيليه ...زوجي" نقاش" و اهله و مولودين هنا اصلا ًو أنا سعيده معاه جد او هو شخص كويس قوي و معايا بنتين "شمس و فردوس"
و ازاي أهلك وافقوا على اختيارك؟ هما بيسيبونا نختار لكن بيحملونا نتيجه اختيارنا بنفسنا بس هم قالوا لي احنا مش هنقدر نجيلك المكان ده .. بس انا باروح لهم و أزورهم على طول.
هنا احسن من بره لأن الشقق كتمه و الجيران ماتعرفش بعض و هنا اريح و على طول الجيران اصحاب و بيلحقوا بعض لو حصل اي حاجه و الجو في رمضان هنا حلو قوي و احنا على طول مع بعض نخبط على بعض في السحور ده لو نمنا اصلاً و بنفطر مع بعض.

رجعت تاني اكلم صباح لأن اولادها كبار شويه وفي المدرسه و سألتها
بصراحه احنا ولادنا "بيستعاروا" من انهم يقولوا احنا ساكنين هنا و بيقولوا احنا ساكنين في "عين الصيغه"
توافقوا ان ولادكم يتجوزوا هنا؟ لأ طبعاً عمرنا مانوافق.
صباح : نفسنا حد يشيلنا من هنا وعايزين نسكن في شقه احنا علشان حرام نعيش هنا ...حرام؟ أيوه لأن المكان اللي فيه الميت ده المفروض يحترم و محدش يعيش فيه كده.

رشا : مش علينا احنا بس علشان معانا بنات و خايفين عليهم و عايزينهم يكونوا في امان
بتحبوا مصر؟ آه طبعاً بنحب مصر بس غلاء الأسعار يعني لما يبقى كيلو المكرونه ب 3.25 جنيه
و كيلو اللحمه ب 43 جنيه طب مش جايبينها ...هنشتري المستورده!!وده كان نهايه كلامي معهم وانا غايه في الدهشه من حواري معاهم الملئ بالعجائب!!

عم فتحي - كبير المنطقه و كبير الغلابه هناك ايضاً

.......

اما باقي اللقاءات .....فهي موجوده بمجله كلمتنا عدد هذا الشهر نوفمبر

و لكن......ماذا في هذا المكان...ايه اللي مصبر الناس عليه كده...الناس دي عشقت المكان

اتولدوا فيه...و بنوا فيه..و هيموتوا هناك...و اللي سابت اهلها و العز و النعيم و اتجوزت واحد اقل منها اجتماعياً و هي بتحبه جداً

الكان ده له سر....احنا شايفينه مقابر على شوية تراب و احجار و احواش

لكن المكان ده في عينيهم حاجه غير كده..المكان ده هو الدنيا و الاخره بالنسبه لهم

و عندهم من القناعه ما يكفي اهل الارض و ابتسامه جميله اوي اوي

قد تتمنى ان تخرج من هذا المكان حين دخولك اياه ....و لكن حين ترى تلك الابتسامه تتمنى ان تظل مكانك بلا حراك لتشاهد الابتسامه الحقيقه الخاليه من النفاق و المصلحه

حينها تتمنى ان تكون معهم....حياً وسط الاموات...او ميتاً وسط الاحياء

حينها ستدرك ان هناك هي الحياه

في النهايه اشكر كل من ساعدني في هذا الموضوع....اخي و حبيبي مصطفى فتحي الذي اقترح علي الفكره

و الزميله الغاليه ندا ثاقب الفنانه اللي ادرات معايا الحوار و التقطت بعض الصور التي ترونها

و مجله كلمتنا.....بيتي التاني

بحبكم

صباحووو - من تصويري

عشنا و يا ريتنا ما شفنا

ممكن تشوف طفل معاق..وتتأثر و تبكي

أو ممكن تشوف اي شخص مصاب بإعاقه و يستدعي هذا عطفك ولا يمنع ايضاً ان يكون مصحوباً بمر الدموع

و قد ترى ذلك...لكن يكون رد فعلك قاسياً

أو حتى تكون مشمئزاً

أو يستدعي ان تبصق على صاحب الإعاقه "و إن كان لا يجوز بأي حال من الاحوال"!!؟

و هذا ما كاد أن يقع مني

ماتستغربش اوي كده...هاقولك

لما كنت ف السعوديه مؤخراً...و بالتحديد في مكه..و في الشارع الذي يقع فيه الفندق الذي اسكن فيه اذ لفت نظري مجموعه من الاطفال ذوي البشره السمراء دون استثناء يجلسون في صف وراء بعض و قد يكون صفين متوازيين

وعلى رأسهم أو بين الصفين، سيده أو مجموعه من السيدات ذوات البشره السمراء أيضاً وأغلبهم منتقبات و مغطيات وجوههن لعله

وسمعت هؤلاء الاطفال ينشدون بهتافات بالضبط كتلك التي نسمعها من الجماهير السنغاليه و جيرانهم و التي تستدعي الماره للنظر و لفت الانتباه

و ما ان اقتربت اكثر حتى وجدت هؤلاء الأطفال لايخلون من اعاقه...اما مقطوع الذراع أو الرجل أو مشوه الخلقه و السلام

و ما ان أمعنت النظر حتى وجدت الماره ينهالون على هؤلاء الاطفال و السيدات بالريالات أو أي نقود و السلام

المهم انهم بيدفعوا مبالغ......و الشئ الملفت للنظر و قد يكون مستفز أحياناً أنهم يمسكون بتلك الأموال واضحه جليه بكميات خياليه بكل سذاجه

و الغريب ان هؤلاء الاطفال لا تجد في عيونهم كسرة من به اعاقه....أو دموع من فقد طفولته الطبيعيه

بل بها كل لا مبالاه....و كل شغلهم الشاغل هي مبالغ الغير المدفوعه

سألت والدي...جديده طريقه التسول "الشحاته " دي....قال لي...دي تجاره يا ابني !!!!!!!!!!!!!!!!!!؟
تجاره؟

قال لي آه....هم بيجمعوا الاطفال دول..أو الله اعلم يمكن يكونوا بيعملوا كده فيهم عمدأ و هم صغار و يشغلوهم معاهم و يجيبوا عن طريقهم الفلوس و اللي بياخدها الزعيمه أو الكبيره اللي بتكون قاعده وراهم و اللي بدورها بتلم هي كمان و كأنهم عيالها!!؟

و بالمصادفه لقيتهم فجأه بيقوموا يجروا و يختفوا من العيون...و ده لأنهم مطاردين من قبل الشرطه السعوديه و أن هذا غير مسموح به أساساً و يتم تنبيههم عن طريق عيون لهم تكون على مقربه منهم و مقربه أكثر من أي ظابط يقترب من المكان

استفزني الموضوع جداً....و فجأه قررت إن انا اصورهم

و قراري ده كان بمثابة اللي راح للنار برجليه

كان منظرهم منظم.... ووسط زحام الناس المتجهين الى الحرم المكي لآداء الصلاه..طلعت الموبايل من جيبي و فتحت الكاميرا و بدأت اظبط زاويتي..و ببص قدامي لقيت اتنين من ذوي البشره السمراء و القامه العريضه الطويله اللي بيطلعوا عنين لعيبه المنتخب و الخبطه منه و المدرجات عدل...لقيتهم وقفوا و بيبصوا وراهم عليا و بيشاوروا عليا

اساساً انت تشوف منظرهم تسيب أي حاجه ف ايدك و تجري...فما كان مني إلا ان انا عملت عبيط و رحت قافل الموبايل وواخد الطريق بالعرض ومستخبي وسط الزحمه و جري ع الحرم...فضلت حوالي نص ساعه بعدها قلبي بيدق جداً و قلقان و لا أكذب لو قلت كنت خايف، لأني كنت حاسس ان انا متراقب...و ما ان يتاح لهم الفرصه انهم يشوفوني....هيعلقوني وش...و ان انا المفروض مني دلوقتي ان انا اسلم لهم الموبايل و أسلم نفسي قبل الموبايل...أو ان اثبت لهم ولائي بأن اقعد ساعتين ف الفرن أو اولع ف نفسي "عشان ابقى اسمر زيهم" و أقعد مع الاطفال ف الصف

و بعد ان احسست بالاطمئنان بعض الشئ...و بعد ان ادركت خطورة ما اقدمت عليه...و بعد ما ايقنت ان الموضوع ده كبير و يمكن يكون وراه مؤسسات كبيره دفعت بهؤلاء البشر ليحصلوا على اللي فيه النصيب....زاد فضولي و زاد بداخلي الإصرار أن اصورهم برضه

و محرمتش...و كلما زاد اصراري على التصوير، كلما زاد الرعب داخلي و صاحبتها دقات قلبي و التي كانت تؤلمني بدون مبالغه في بعض الاحيان

و ما ان كنت في طريقي الى الفندق حتى وقفت و امسكت بالموبايل من تاني و بطريقه صايعه كده باعملها حاولت اصور ولكن للأسف كانت الزحمه تغطي عليهم و لكن استطعت اخيراً ان ألتقط هذه الصوره و التي تشاهدها على رأس الموضوع... و قلت آهي تصبيره

ثم كان النحس حليفي في كل مره بعدها...حتى الشرطه كانت معاهم...لأني مره خلاص آخدت زاويتي و لسه هوب...شرطه ..كله جري

و ما زال السؤال الآن...هي ليه الناس دي بتعمل كده

و ليه بيستغلوا عطف الناس و مشاعرهم مقابل المال...طريقه قذره...كان نفسي عليهم واحد واحد بحذائي

تشتكي ربنا للخلق...وكأن لسان حالهم بيقول....شفتو ربنا عمل فينا ايه؟

ولا تمانع البنات أن تكشف ما تبقى من رجلها حتى النهايه بالكامل حتى تحصل على بضع ريالات قذره مثلها

و ايه التنظيم العالي ده...أطفال...و كبيره قعده...و كلهم سيدات...و ماتلاقيش راجل قاعد معاهم..لكن تقريبا دور الرجال هو الحمايه مثل اللي كانوا هيضربوني أو يمكن انهم شافوهم سمر البشره مثلهم فغاروا عليهم...على اساس ان الدم واحد!؟

و ايه ذنب الاطفال دول...يتعمل فيهم كده لو كانت الاعاقات دي عمد...و ليه يكون اول حاجه يتعلموها هو اللعب بمشاعر الناس

لكن الناس كانت اكثر منهم سذاجه و ينهالون عليهم بالاموال

الشئ الذي دفعني لأن اغير اسلوب تفكيري نهائياً طالما ان الناس دي مش حاسه هي بتعمل ايه و بتدفع و خلاص

.....

إن انا اشارك معاهم

و اجمع فلوس...و نعيش بقى

بس يا ترى....لازم اقطع دراعي؟

ده انا اقطع دراعي التاني لو عملتها

ومين قال كده ؟

سمعت كلام كتير

كلام غريب

بقالي كام يوم ..كل الناس اجمعت ان رمضان و العيد السنه دي كان غريب

رمضان عدى بسرعه اوي و محدش حس بيه

و العيد كان غريب

ما كانش عيد

محدش من اصحاب المحلات كان واخد اجازه و كله كان شغال

و في محلات ياميش رمضان فاتحه لحد دلوقتي بتلقط رزقها!!!!!؟

و ليله العيد بالليل الشوارع كانت فاضيه

ستوب...كفايه كده

ايه...حتى رمضان مش عاجبكم

و حتى العيد

شر البليه ما يضحك...بجد دي كارثه

اصل احنا اللي بقينا غريبين

مش رمضان ولا العيد

احنا اللي بقينا و حشين

دي ايام ربنا بيجيب معاها الخير و الرزق

احنا اللي مش عايشين الايام دي صح

للأسف

بنهتم بالمظاهر و الاحتفالات و استقبال الايام و توديعها

لكن العباده ف رمضان مظلومه

المساجد تبكي في اواخر رمضان...بدلاً من ان يبكي الناس

احنا اللي مالناش طعم مش الايام

الايام مش بتتغير...احنا اللي بنتغير

و بإيدينا

احنا اللي نستاهل ان رمضان و العيد يشتكوا مننا

احنا اللي ما نستاهلش

لازم نراجع نفسنا

اعرف نفسك اولاً...ثم احكم على الايام

ادي مدونتك..وش جديد

هاي...ازيكو

كان نفسي اعمل تغيير من زمان

فبدأت اغير من نفسي أولا

ثم بما حولي

و الآن جاء الدور على مدونتي

ما هي بيتي برضه

و لازم بيتك يكون له وش جديد

يا رب النيو لوك يعجبكو

و كل اللي جاي ان شاء الله

وش جديد

تاج قديم......و رحله من اجل حياه افضل

لو قالولك اختارعصر من عصور مصر عشان تعيش فيه تختار اى عصر وفى عهد اى حاكم واشمعنى؟

اختار عصر الفراعنه...لأنهم كانوا يسعون لرسم بداية وطن و انشاءه من تحت الصفر و كان كلهم نشاط و اكيد كان في سلبيات و لكنها قليله جدا بس ده احسن بكتيرحتى ع الاقل يكون الواحد في عصر كل الناس بتحكي عنه "مدحاً" ولا ايه

اول اولوية فى حياتك عيلتك ولا شغلك ولا اصحابك؟

اولويتي هو كل ما يسعدني في مستقبلي بس ف الاخر هنلاقيهم كلهم معانا..نفسي اكون ف احسن شغل علشان اتجوز و يكون عندي احسن عيله و اكون فرحان وسط احسن اصحاب

ايه اكتر حاجة بتحبها فى رمضان؟

انه بيتكرر..و بيسيبنا علشان ييجي تاني......و علشان هو سبب خير لكل الناس

اوصف ليا اجمل فطار ممكن تفطره؟

انا فطرته فعلاً...كان في السعوديه في المدينه المنوره....على تمر أول مره اكله ف حياتي ولا اطعم و شربت معاه ماء زمزم

لو انت حاكم على مجموعة من الافراد حتكون عادل؟ طب حتعمل ايه عشان تتأكد انك حاكم عادل؟

هاحاول على قدر الامكان...و علشان اكون عادل...هاتخلي عن كوني حاكم..و اقف ف صفهم و افكر معاهم على اني واحد منهم و كل واحد فينا يحكم نفسه و يساعد غيره اكيد كلنا هنستريح

اللى بيبوظ الحكام ..نفسهم ولا الشعب ولا الحاشية المقربة؟؟

النبي عليه الصلاة و السلام كان من افراد عائلته مشركين و ايضاً قوم قريش كانوا كفار على مشركين ف البدايه و النبي ادى رسالته دون ان يتأثر.....أعتقد الرساله وصلت...أكيد نفسه طبعاً طبعاً طبعاً

مين اكتر اعلامى مصرى بتحترمه؟؟

التلفزيون....لأنه بينقل كل حاجه زي ماهي حتى لو كانت تزوير أو ادعاء أو كذب لكن عمره مايكذب أو يدعي أو يغير شئ مع انه مالهوش قلب ولا عقل بالاضافه الى انه صيني

قريت ديوان عمر مصطفى صاحب بلوج تجربة" اسباب وجيهة للفرح" عن دار ملامح ولا لسه؟؟

نووو...خالص....بس هاحاول اوصله ان شاء الله ...و لو اخدت عنه انطباع هيظهر على مدونتي

لو ممكن تشتغل شغلانة تانية غير اللى انت بتشتغلها او كنت بتشتغلها كنت تتمنى تبقى ايه؟؟

انا صيدلي و صحفي.....بس كان نفسي اكون جراح..مع ان مجموعي كان يدخلني طب مستريح موووت بس انا اخترت صيدله

بس حاسس ان مهنه الجراح دي اهم حاجه ف الدنيا ان ربنا يجعلك سبب مباشر ف حياة ناس و انقاذهم ...بحب اوي اساعد الناس

ايه تانى بلد تتمنى تعيش فيها بعد مصر؟؟

المدينه المنوره بجد اهلها ناس طيبين اوي...انا كنت فاكر اسكندريه احسن بلد و احسن ناس لحد ما سافرت السعوديه و عشت شويه مع ناسها الفتره كانت مش كبيره بس الانطباع خلاص ثبت ف النافوووخ

و ممكن دبي أو لبنان...أصل انا عاشق للطبيعه بس يكون معايا كاميرا

اوصف ليا ترتيبات اجمل فرح ممكن تحضره؟؟

يكون في بحر..جانب شلال...و العربس و العروسه قاعدين على صخورو المعازيم ف لانش كبير و البوفيه سيي فوود

بتراعى كلام الناس والقيل والقال؟ لو اه او لو لا قولى ليه؟

انا باخد رأي الناس و نصحهم و افكر فيه و اقارنه بالمنطق و العقل و اعمل الصح

لكن ما امشيش ورا كلامهم ..و لا اصدر دماغي

صحيت من النوم مالقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنة حتبقى سعيد؟

احتمال.....لو كان مزاجي رايق قبلها هاكوون سعيد

السعادة هى؟؟

ان تكون سبباً في اسعاد الاخرين

عندك امل ؟ اسبابك ؟

اكيد.....الشباك بيبقى مقفول و متربس..و الضوء بيدخل منه

طول ما في حياه لسه في امل..احنا عايشين على حسه اصلاً

لما تحب تهرب من كل شىء بتروح فين؟؟

ادخل الاوضه بتاعتي و اقفل على نفسي

امتى اول مرة اخدت فيها نفس طويل كده وقلت بينك وبين نفسك ياااااه انا فعلا كبرت؟؟

مستنيها بفارغ الصبر

لما بتعمل عمل خيرى بيكون ايه هو دافعك الاول؟؟

رضا و حب الله عن طريق مساعدة الناس المحتاجين

بتشرب سجاير؟لو الاجابة اه ايه شعورك لو شفت ست بتشرب سجاير وليه؟

نوو خالص الحمد لله طبعاً....لما بشوف واحده بتشرب سجاير بحس انها فقدت شئ عزيز و غالي اوي عليها ...انوثتها

بتعرف ايدك اليمين من الشمال ازاى؟

لو حطيت ايدي ف جيبي و لقيت فلوس يبقى اليمين...و لو لقيت الموبايل تبقى الشمال

الى جانب ان ايدي اليمين باكل و اشرب بيها...ما ايدي الشمال بقى.......مش باكل بيها خاالص

ايه اكتر اله موسيقية بتحبها؟

الجيتار الاسباني....و العود

فى رأيك ليه الذوق والنخوة اتعدموا؟

هما مانعدموش...لكن اهلهم اصبحوا ندره

ايه الحاجة اللى لو حصلتلك تبقى سعيد قوى؟

اني اكون وسط اصحابي اللي بيحبوني و بحبهم مهما كانت الظروف و ف اي مكان بجد بحس معاهم بامان اكتر بكتير من اللي باحسه مع اهلي

تختار يبقى عندك ارض زراعية ولا اجنص عربيات ولا كام عمارة ولا فلوس فى البنك؟

اعتقد الفلوس مفتاح كل شئ بس لازم تكون في استثمار يحفظها من الهلاك او انها تخلص

البحر ولا النيل؟؟؟

ودنك ولا عينك؟؟؟

مركب ولا طيارة؟

طياره

عاقل ولا مجنون؟

العقل و الجنون وجهان لعمله واحده....لو قلت عاقل الناس هتقول عليا مجنون....و لو قالوا عليك مجنون يبقى انت سيد العاقلين

تقرا كتاب ولا تتفرج على فيلم؟

حسب ما تطلب...اصلها بحالات

بتمرر التاج لمين؟؟!!!!

مصطفى فتحي شباب شو........تصاوير ريم.......شباك محمد شبل

و بهديه لبابا و ماما و اخواتي و اخوانا و قرايبنا اللي ف الخليج :) :) :)

و رجعنا بالسلامه...و كل سنه و انا طيب

انا جيــــــــــــــــــــــــــــــــــــــــــت

وحشتوني مووووووووووووووووووز

و بالصدفه كان مع رجوعي احتفالي بعيد ميلادي

يعني بدايه جديده من مجاميعه

فات من عمري 21 سنه

هاقفل وراهم باب

وهافتح باب جديد

هاحاول انسي همومي

و اعالج عيوبي

واستمر في نجاحي

واستمر في حب الحياه

و حب الناس

بحبكم......بجبكم اوي

سعودي....غير متاح مؤقتاً

لدواعي غير امنيه

سوف اتوقف عن التدوين

و مش هاقدر اقول حاجه زياده

بجد مش هاقدر

ماتقلقوش خالص

اطمنوا

خير ان شاء الله

عارفين ليه

اصل انا مش هاكون هنا

انا هاكون هناك

عارفين فين

عند ربنا

بالظبط....انا رايح اعمل عمره

علشان كده مش هاقدر ادون...بس مؤقتا

مش حاجه كده ولا كده

انا هادعيلكم......و انتو كمان ادعولي

ربنا يرضى عنا.......و يحبنا

محدش فاهم حاجه خاااااااااالص

انت ممكن تسمع خبر...و ممكن تصدقه او لأ

لكن انك تسمع خبر...وبعدين...هو انا لسه هاحكي

بص يا معلم

سمعنا مؤخرا نية حنان ترك و سامي يوسف في اصدار مجله دينيه و التي كان من المفترض بداية نشرها في شهر رمضان الجاري و لكنه تم تأجيل النشر لموسم الحج لدراسه الموضوع من جميع جوانبه خاصة و انها تعتبر التجربه الصحفيه الثانيه لترك بعد التجربه الغير ناجحه والتي كانت عباره عن مجله " نونه" للأطفال و التي توقف اصدارها لعدم وجود الدعايه الكافيه لذلك

عجبتني الفكره دي قوي...خاصه بعد ما التزمت حنان ترك و لم تستقر هي حاليا على الاعتزال ام اكمال المسيره و لكن اكيد هتكون في طريق جديد محدود و حسيت ان هما عندهم رساله بيحاولوا يوصلوها بشتى الطرق سواء بالتمثيل أو الصحافه أو الطرب

و من خلال متابعتي لهذا الموضوع كل ما وجدته بالفعل هو اخبار عن تأجيل الاصدار

و كانت الفاجعه الكبرى حينما اتطلعت على احدى صفحات موقع ف البلد حيث كانت تصريحات قتلتني

تبين لي ان الموضوع كان فشره كبيره...بس كبرت قوي و وسعت جداً

حيث أكد وسيم ملاك مدير اعمال سامي يوسف أن سامي يوسف لا ينوي مطلقاً عمل اي شئ من هذا و ان هذا الكلام لا اساس له من الصحه مطلقاً و ان سامي لم يتفق مع اي أحد على اي اصدار مجله او شئ من هذا القبيل سواء في مصر أو في اي مكان بالعالم و ان هذا ليس من اولوياته في الفتره الحاليه!!!!!!!!!!!!!!!!!70 مليون علامه تعجب و دهشه

الله يخرب بيوتكم......هجس و فشر فظيع

انتو فاضيين ولا ايه...بجد حل فظيع للبطاله..و احسن و اسرع وسيله للدعايه و الاعلان

دي مش بس اشاعه...ده الموضوع محبوك حبكه منيله.....و اتأجل بقى عشان كذا و كذا و الشغل هيكون في موسم الحج.....ده ناقص يعملوا هم مجله بنفسهم و يحطوا عليها صور و اسماء ترك و سامي بمقالات وهميه..... و عيش بقى

ربنا يستر...ده ناقص اصحى الصبح الاقي سامي أو ترك بيهاجموني و يطالبوا برقبتي ،لأن أنا تابع لجهه معاديه من شأنها التشويش على الدعايه لاعمالهم الفنيه الجديده...و تطلع فشره برضه ف الاخر

و يجعله عامر

كاميرا ف الموبايل

المره دي مش هاقول كلام

و مش انا اللي هاتكلم اساساً

الصور هي اللي هتتكلم

انا هاوي تصوير و مش محترف

بس باعشق الكاميرا

ها ها.... و هي كمان بتحبني

من تصويري

و لســــــــــــــــــه...انتظروا المزيد

باركولي....و هنولي

مع بداية عام دراسي جديد

ومع استقبال عام جديد من العمل

لأول مره....و باحمد ربنا من كل قلبي

EVENTS تم تكليفي بأن أكون المنظم للجنه الاعلاميه و منظم الـ

في الكليه و اتحاد الطلاب

و ده لأن الكليه شافت نجاحي في مجله كلمتنا

و ده بفضل الله طبعاً

و عشان كده قررت يكون في تعاون بين الكليه و بين مجله كلمتنا

و المجله رحبت بكده و ده طبعاً.....لأن

كلمتنا.....في حياتنا، و جامعتنا

كفايه بقى....هتغرقوني ..حرام عليكم

مش عايز اسمع كلمه زياده....بجد خلاص طهقت

الكل بيتكلم ف الدين...و الكل معاه دليل

و احنا اللي بنغرق في النهايه

و مالكش عـذر....بس فين الصح

امشي ورا مين

اذا كان كلام النبي اصبح موضع خلاف

انا حضرت درس...و قال الخطيب انا آسف...ربنا يغفر لي

الحديث اللي انا قلته امبارح كان حديث موضوع..و النبي (ص) برئ منه

الكلام صح و كل حاجه و فعلاً النص سليم "مليون ف الميه" لكن النبي ما قالش كده

حلو قوي لحد كده....؟

و انا ف خطبة الجمعه.....سمعت الخطيب يذكر هذا الحديث لأنه له علاقه بفضائل الاعمال في رمضان

و بعدها قاله في درس في صلاة التراويح

قلت ياد انت دلوقتي في رساله ولازم توصلها يمكن الشيخ ده وقع في خطأ زي الشيخ الاولاني

و بالفعل رحت و اتكلمت معاه..و هو كان مرحب

بس جاب لي كتاب "تقيل " في الحديث الشريف و الحديث مش موضوع

احب انبه بس اللي ما يعرفش يعني ايه حديث موضوع

هو كلام تم انسابه للنبي (ص) و النبي لم يقوله و هو مبرئ منه

حتى لو كان ده كلام صح و سليم زي الحديث اللي انا باتكلم عنه

قلت له طب في كتاب تاني طيب ممكن نستفسر منه....؟

قال لي دور....!! ادور؟

المشكله انه حد انا احترمه..ما علينا و لكنه سألني

اللي قال الحديث ده ملتحي؟

قلت آه....قال لي سيبك منهم

هما كده بيحرموا حاجات و بيسمعوا وخلاص

سمعوا حاجه من الشيخ الفلاني ..خلصت " و الكلمه خنقتني بس سكت" في اهم م الرد عليه

ازاي يترد كلام العلامه ده...هو في حد احسن منه في الحديث

ده بينزل الخير لما يذكر اسمه؟

قلت له انا بجد مش عارف ..انا سمعت كلام و لازم ابلغه ..دي عن النبي

انا بجد كده تائه...طب اصدق مين؟

قال لي بجد انت صعبان عليا و الشباب كلهم صعبانين عليا

محدش بيقرا..الكتاب قدامك اهو..احكم

قلت له انا بجد مش عارف...انا معنديش علم

انا حسيت اني لازم اقول حاجه...لأن عاقبة نقل الاحاديث الموضوعه مش سهله

ما تسألش يا بني و ماتدورش..و ماتبلبلش دماغك

قلت طب أنا هاسأل الشيخ الاولاني اعرف جاب الحكم ده منين

قال لي اسال...و ماتجبش ليا رد...انا معايا الدليل بتاعي

هو في حكم بعد الشيخ العلامه ده!!!!........مين؟

انا هاشد ف شعري

نيجي هنا يقولوا لنا هناك

و لما سالته عن الغناء و الاستماع للموسيقى

قال لي الغناء كالكلام...حسنه حسن و قبيحه قبيح

و الموسيقى؟....قال لي ما هو نفس الكلام

يعني انت شايف ايه؟...قلت له انا اصلا بحب الغناء و الموسيقى

بتريحني و كده بس مش بتثير شهوتي ولا حاجه

بس مش كل حاجه احبها هتبقى حلال اكيد

قال لي خلاص...و بعدين في موسيقى بيعالجوا بيها دلوقتي

و دي انا اعرفها بالفعل

و سيدنا عمر بن عبد العزيز كان بيتعلم الموسيقى

مالها الموسيقى....في حين ان رأياً اخرا قد سمعته يحرمهما قطعياً

طب اصدق مين؟

طب اروح فين؟

لما انا عايز اتعلم

و عايز اعرف

اعمل ايه ؟؟؟

بس خلاص..محدش يفتح بقه بكلمه

انا عارف انا هاعمل ايه

مش عايز تأليف و حياة ابوكم

هتضيعونا الله يهديكم

كل واحد معاه دليل يخليك تقتنع مليون ف الميه

انا بقى مع نفسي و ربنا هيلهمني

ان شاء الله

بيب بيب اهلي.... بيب بيب اهلي

هاااااااااااااااااااااااااي

ازيكو.....انا مش هتكلم كتير

انا بس جاي اقول

مبروك لكل الأهلاويه

مبروك كتير للأهلي

رغم ان المباراه كانت غريبه في بعض المواقف

فبدايه هي مباراة قمه ....من غير اهل قمه...لأنهم لعبوا المباراه وهم لا يحتلوا المركز الأول

ثانيا ان فوز الاهلي فيه شك عشان تسلل ابو تريكه...و نلاقي بكده

ان الحق جاء من غير اهله ...و ضاع من أهله..عشان ضربة الجزاء ضاعت

بس ماليش دعوه، أنا مش متعصب، بس الأهلي حديد و يستحق الفوز

يستحق الفوز

و نستحق نفرح

بدون تعصب

الزمالك...حظ أوفر....مش بنشتم ولا نعيب

الزمالك لعب حلو قوي

....و

الأهلي حديــــــــــــــــــــــــد

اضحكوا المساجد كي يبكوها

كان المسجد خاوياً

يبكي من الوحده

حتى اتوه جميعاً

ففرح بهم شديداً

و رحب بهم...و وسعهم و لم يعبأ بالزحام

بل احب الزحام و عشقه

ثم هجروه فجأة

فبكى ثانيه

ثم جاءوه بعدها بعام

فضحك من جديد

حيث رمضان من جديد

.............

اكتب تلك السطور....و انا من داخلي قلب المسجد افرح ايضاً و الله لفرحه

و اكاد ابكي لبكاءه

اصف لكم صلاه الفجر من أول يوم في رمضان

ادخل المسجد....مفيش مكان لقدم

الفجر!!؟؟؟؟ اللي كل الناس بتكون نايمه فيه!!؟؟

ما شاء الله

فرحت قوي

الأيام تعدي....يوم ورا يوم...رمضان بيخلص

على آخر رمضان ...الناس اختفت!!!!؟

في ايه؟

الناس راحت فين

طب كانوا في الأول كتير ليه

حد يجاوبني و يريحني

حد يعرف؟؟؟

طب هي الناس دي مسلمه بجد ولا.........؟

محدش يعرف

هم بينافقوا.....ولا ايه؟

و بينافقوا مع مين؟....مع ربنا؟

استحاله

يمكن مع نفسهم....او ممكن بيضحكوا على نفسهم

و لا يمكن اصلاً هم بيعبدوا رمضان

و لا عشان مكانوش مستعدين كويس للعباده في رمضان

و لا عشان ايه بالظبط....انا تعبت من كتر السؤال

حد يفهمني....و يا ريت يقنعني

انا باعشق منظر الناس و هي بتتزاحم على الصلاه

بحس ان الدنيا لسه فيها خير....و الناس عندها خير مالهوش حدود

و بافرح قوي لما اروح اصلي في مسجد و مالاقيش مكان...و اروح اصلي في جامع غيره اكبر

بافرح قوي بجد....لكن

بازعل قوي برضه.....بقى ده ينفع

نسيب المسجد وحيد بيبكي....بعد ما خليناه يضحك من كل قلبه

كده....طب ليه...مين اقنعهم مايجوش المسجد تاني

حد يريحني....بجد انا تعبت

بدل ما كان نفسي كل يوم يكون رمضان........لأ

نفسي كل يوم يكون....... أول يوم في رمضان