مجرد وجهة نظر

بحب الحياة بحب الناس - محمود سعودي

.

إذا باغتك البعض بالهجوم .. فلا تتعجل للدفاع عن نفسك

و لكن

تمهل قليلاً .. ثم فكر
علّهم على حق .. علّك غافل

! دورة حياة الملل

.

بحب الحياة بحب الناس - محمود سعودي

أحياناً تكون الحياة مملة
و أحياناً نكون نحن المملين

لكن في كلتا الحالتين .. نكره أنفسنا !؟

مدبولي إلى رحمة الله

! عيدكم أضحى

بحب الحياة بحب الناس - محمود سعودي

.

و هي بداية دائرة جديدة .. أعوام تمر و سنون تمضي .. و ها هو المطهر المنقذ قد أتانا ، فكل عام و نحن بخير إذاً ..

هو عيد أضحى ، ليس بمجرد عيد بالنسبة لي .. ليس بمجرد أيام أربع يسبقهما يوم بقدر أعوام في الفضل .. بل هو وقفة بالفعل ، ولكنه وقفة لجميع الخلق في تفسيري أنا و ليس وقفة لحجاج أتوا من كل فج عميق !..

هو عيد نحر للعامة .. و عيد نحر و ذبح لدي ، فعظيم الفرق بينهما

فالنحر هو طعن في العرقين اللذان يوجدان بين الحلقوم و المرئ .. أما الذبح فهو قطع الحلقوم و المرئ و ما بينهما.

و ما أريد أن أذبحه هو دنس عام مضى ، فهذا الدنس يتمثل عندي في صورة كبش أذبحه كل عام .. و قد صادف العام الماضي أن عيد النحر كان مع بدء عام ميلادي جديد .. فكان نحراً فعلياً ، وقريبين هما أيضاً هذا العام . هذا الكبش الذي أكل و سمن و تربى على هم و غم و كآبة و قلق و كل شعور سلبي يقطنني ، فأنا أتركه ليعظم .. حتى يحين موعده .. و موعده هو عيدي .. و كم أتمنى أن يكون لكم فيه عيد أيضاً .. فكل عام و أنتم بسعادة .

هي تهنئة من القلب تنبع لك بشري .. و لكن أذكر بأني أهنئكم بعيد ذبح وليس بعيد نحر فحسب .. فصوموا ، و انحروا ، و اذبحوا .. تسعدوا

أحبكم

! و ماذا بعد العودة

بحب الحياة بحب الناس - محمود سعودي

.

و بعد فترة قد أصيب فيها قلمي بالوهن .. أو أنه كان قد فر هارباً من وهني أنا .. (على أي حال ) .. فها هو و قد أعطاني الفرصة مجدداً و سمح لنفسه أن يقع بين أحضان أصابعي من جديد

هي محاولة لأتواصل معكم ثانيةً ، بعد شئ من التوهان .. أو التركيز المبالغ فيه ، فهما وجهان لعملة واحدة .. فالعامل المشترك بينهما أنهما يفصلان الآدمي عن واقعية الوجود.

أو قد تكون فترة من الطمع المفرط .. حيث أني كل يوم أتمنى أن أكون شخصاً جديداً ، بين صيدلي أو جراح أو صحفي أو كاتب أو مذيع أو ممثل أو شاعر أو شعب مصري بأسره .. تمنيت أن أكون مصر .. و من ثم أكون رئيس جمهورية .. نفسي! .

لا أدري إن كان طموحاً أطلق له العنان .. أم أن بداخلي ساحة كبيرة تسع الكثير و الكثير .. أم أنني اتعمد الفشل في الواقع و أعطي لذهني المزيد من الوقت ليحلم و يحلم و يحلم...

ثم ماذا عن تحويل الأحلام لجزء من الواقع .. ماذا عن أنا ، ماذا ستكون الوظيفة في بطاقتي بعد التخرج .. حالم ؟؟ ، طموح ؟؟ عضو نشط ؟؟

القصد .. أنني لم أكن غائباً .. لكني لم أكن أدري ماذا أقول ، فكان الصمت هو سيد الموقف و كنت أستمتع بالإنصات إليه .. لقد كان بليغاً !

الخطب .. الذي دفعني لأقول كلمتي فيما بعد لأن كثرة بلاغته جعلت منه مملاً !

الشئ .. الذي يجعلني سعيداً ، ويبعث في داخلي الأمل ، لأن كل ما سلف لا يدل إلا على أني لا أزال حياً أرزق .. إنساناً لم أزل .. بقلبٍ يحس .. بعقلٍ به بعض رواسب فكر .

نهاية ، عدت لأني ... أحبكم

!! و ف رمضان بنقوله حضرتك

بحب الحياة بحب الناس - محمود سعودي

.

إزيكم ... أولاً بجد بشكر من كل قلبي كل اللي بعتوا تهانيهم بالشهر الكريم و كل اللي اطمنوا عليّا ، وبجد انا آسف اني مقدرتش أرد لأني مكنتش حابب اتعمق ف الموود أكتر من كده ... ما علينا ، ده موضوع انا كتبته الشهر ده فمجلة كلمتنا عن رمضان .. يارب يعجبكم

= = =

انت جيت شهقة يا رمضان؟ ... نورتنا يابو صيام ! ، كل سنة و كل الناس اللي بتقرأ مجلة كلمتنا طيبين ، أما الناس اللي مش بتقرأ مجلة كلمتنا فهقول لهم كل عام وانتم بخير

بما ان رمضان بيهل علينا كل سنة ، وبما اننا كلنا بنتكلم عنه ..فأحب اقول لكم ان الموضوع ده مش جديد خالص ، وياما اتكلمنا عن رمضان واللي بيحصل ف رمضان وشكل مصر ف رمضان ، بس انا كنت قاعد سرحان كده ، وأعدت أفكر بقا ...لقيت ان في مهن كتير تقليدية .. لكنها بتأخذ شكل وطابع جديدين في الشهر الكريم ، ناس معينين ...بتنتظر الشهر ده من السنة للسنة بفارغ الصبر ، طبعاً مش الشحاتين ، لأن الشحاتين دلوقتي بقوا يشحتوا طول السنة ، دول حتى يمكن بيأجزوا ف رمضان ، أو بيحترفوا ف دول عربية ...وما شاء الله الشحاتين دلوقتي بقوا أغنى من الصيادلة ، ما علينا بلاش حرقة دم وماتخلوش الواحد يبوظ صيامه ف الصفحة دي ..العدد لسه طويل ، والمجلة لسه بخيرها.

بياع الفول .. آسف.. الاستاذ المحترم بياع الفول ، هكذا يكون لقبه في الشهر الكريم .. يتحول بكل بساطة الى بياع صاغة ولو انه لسه واقف بعربية .. ممكن يخلص إدرة واتنين في عدد قليل من الساعات خاصة بعد صلاة التراويح ، وشكل الناس وهم واقفين عليه بيبقى جميل أوي خاصة ان عربية الفول دي بتجمع ناس من كل طبقات مصر ، مفكرتش يوم كده ... اشمعنى ؟ ، طب ليه ؟ ، ازاي ؟ .. ده بيبيع فول يعني ومش جديد ولا حاجة ... وسبحان الله بعد أيّام تلاقي البياع بيدعى ربنا مايروحش البيت ولسه معاه فول ... هي ارزاق وربنا كاتبها وقاسمها ...ولازم نقول سبحان الله
بياع العرقسوس .. أو معالي بياع العرقسوس ، في الايام العادية ممكن تلاقيه بيجري ورا الناس في الشارع ، نفعنا بأي حاجة ياعم الحاج ، يا استاذ ... طب اشرب ببلاش قبل ما يحمض !... ولما يهل هلاله تلاقيه اصلاً معبي العرقسوس في اكياس علشان ينجز .. وبيبقى مش ملاحق ... بيبقى فيه ايه العرقسوس في رمضان عن غير رمضان ؟ ايه الجديد؟؟ ... هي أرزاق ... وبطل رغي بقى !؟

كنافة وقطايف ... انا نفسي مرة ف حياتي أكل قطايف في وقت مش في رمضان ... يعني باحلم كده ، والنعمة أتصور معاها عادي مش هاتكسف ! ... طوابير وخناقات وشد و جذب في الساعات اللي قبل الفطار قدام بياع الكنافة و القطايف ...مع انها لسه ( نيئة ) .. وفي لسه حوارات هاتتعمل في البيت علشان تستوي .. لكن رمضان من غير كنافة زي بالظبط شهر رمضان من غير قطايف ... وممكن تلاقي نفس الراجل ده بيعدي عليكم في البيت بعد رمضان بكنافة مستوية ومحشية بالبندق وبنص السعر وانت مش هاتفتح له أصلاً ... كنافة ايه دي اللي هناكلها بعد العيد !!

سبحان الله .. رمضان بييجي ومعاه رزق كتير أوي لكل الناس ، مهما كان مهنته ومهما كان اللي بيبيعه ، عاوز اقول حاجه كمان قبل ماتقلبوا الصفحة .. مصر في رمضان و العيد بيكون ليها طعم تاني ... بجد مصر ماتتعوضش في الفترة دي ، طبعاً باستثناء اللي ربنا كرمهم بعمرة رمضان ، لكن بكل أمانة مصر شكلها بيبقى حلو أوي في الوقت ده ، والله أحياناً بحس ان الهوا نفسه متغير في الفترة دي ، تحس ان الجو جو رمضان ، أنا بقول كده لأني مرة العيد عدى عليا و انا برة مصر ، حسيت بوجع جوايا ، ياللا... ربنا يديم فضله علينا ... وكل سنة وانتم أحلى الناس .. و رمضان عبد الكريم بيسلم عليكو أوي أوي أوي

:D

بحبكم ... كتير أوي

! أنا آسف

بحب الحياة بحب الناس - محمود سعودي
.

انا تعبت خلاص

مضطر أبعد شوية .. يمكن ارتاح

كل رمضان و انتم بخير

بحبكم

! شخابيطي 2

بحب الحياة بحب الناس - محمود سعودي

.

.

ولا زال العراك بيني وبين الجامعة .. ولا زالت الظروف تساعدها على الوقوف أمامي ، لكني أصر ان أكون انا وحيدا أمامها هي و تلك الظروف ... قبل الامتحانات بأيام ، صحيت من النوم على صوت آهات أمي وهي بتصرح من ألم شديد في جنبها على غير المعتاد ، دقائق تمر ، الدكتور في البيت ، لا عادي نزلة برد في الكلى .. خدي الدوا ده و هتبقي تمام .. واعملي الاشعه دي ...اعمل الاشعة ، حصوة كبيرة في الحالب الايمن ! .. الكلية اليمنى تقترب من التوقف عن العمل تماماً وتتضخم قليلاً ..تزداد المعاناة ، الوقت يمر ...و أنا مشغول البال ..و الامتحانات تقترب و الوقت يهدر بكثافة .. دكتور آخر للتأكيد .. يطلب عمل جراحة عاجلة لاستخراج الحصوة ، دكتور ثالث ...لابد من التفتيت بالليزر أولا ، دخلت الامتحانات ... الآداء أكتر من سئ ، ليلة الامتحان اخوتي بأكملهم يونسوني في غرفتي الخاصة لوجود ضيوف كثيرون ، الاطفال في البيت يملؤون الغرفة و البيت بالسعادة في ليلة الامتحان ، عدد ساعات قليل من النوم ... تلات مواد تقال جدا الاداء فيهم متوسط ... تنتهي الامتحانات ... لازالت الوالدة في تعبها .... ولكن التحسن يعمل ببطئ تحت اذن المسكنات ، النتيجة طلعت و التقدير العام جيد بعد جيد جدا العام السابق بعد امتياز العام الذي يسبقهما ، اشعر بنتصار الجامعة و الظروف .. لكن العبرة بالنهاية ، ولن ارفع الراية البيضاء مهما كان ، ايام تمر .. والحمد لله تم استخراج الحصوة بأكلمها على فترات بمجمل ست عمليات ثلاث منها بالمنظار و ثلاث منها بالليزر ، اشغر بضغط شديد .. كم أود ان اترك الدنيا و اذهب الى عالم آخر كي اشعر فيه بحرية كل شئ ..حتى حرية التفكير.

بعد انتهاء الدراسة .. اشعر بأن هناك مرحلة انتقالية غريبة حدثت بدخول الاجازة من حيث كل شئ حتى الناس ، الاصدقاء ...المقربين من المقربين من الاصدقاء .. اكتشفت انهم كانوا من ضمن مناهج سنه رابعة صيدلة ، يعني راحوا في الحرب مع دخول الاجازة ... الحاجه اللي ضايقتني اكتر ان كان ممكن اوي واحد من المقربين دول يفكر نفس تفكيري و بالتالي هاطلع انا كمان من ضمن المقرر يعني انا مقصر في حقهم انا كمان ، و دي مشكلة تانيه اننا دايما بنشتكي من ناس زمايلنا انهم بعيد عننا و بننسى اننا طرف ف علاقة مكونه من اتنين انا و هو ... و بالتالي بنحط نفسنا في السجن و احنا مش حاسين

في الفترة اللي فاتت حسيت ان الناس بقوا معندهومش قلب ،حسيت ان الناس عاملين زي المكن الآلي ، بيشتغلوا و بس ، محدش بقا يحس بحد بصدق ... حاسس ان الوشوش هاتتبدل كمان فترة ، كلنا هنتغير .. مش هانبقا زي المكن الآلي و بس ...لأ هانبقا فاضيين ، علشان نعبي ونلم فلوس

اسمحولي أغمض عيني تاني ... لسه في كلام كتير ، بس خلوني اجمع لقطات كتير من أيامي اللي فاتت

بحبكم

! شباب على طول

بحب الحياة بحب الناس - محمود سعودي

.

شباب على طول

برنامج شبابي بحت

برنامج شبابي من الألف إلى الياء

على قناة البدر ابتداءاً من يوم الجمعة المقبل

: البرنامج من اعداد

صبري سراج - حسين هاشم - محمود سعودي

.

: تقديم

رامي عقاد

.

: إخراج

أحمد غمري

.

دعواتكم ... بحبكم

! شخابيطي

بحب الحياة بحب الناس - محمود سعودي
.
من أيام أو شهور .. كنت انا زي ما انا لكن من المؤكد ان الظروف بتختلف وتتنافس علينا ، الأيام اللي فاتت حصل جوايا أحداث كتير أوي ..حاسس بسنين عدت جوايا ..بس من غير ما أكبر ، حاجات كتير أوي بتحصل اوقات اكون فرحان ، اوقات بكون طاير م الفرح ، اوقات اكون مكتئب و أوقات بحس اني مليش لزمة في الحياة ..عايش فوق الميزان ، وبقول وهو انا عايش ولزمتي ايه ، كفاية بقا عليا كده .. ومادام انا كان جوايا أحاسيس كتير ، اكيد كان جوايا اشخاص كتير كل واحد فيهم بيصارع الباقي من جوه في سبيل انه لما يفرض سيادته من جوه يظهر اثره سيادته عليا من برة واتعامل بيه مع الناس . في وقت الفرح يظهر من جوه مقاتل شرس بسيف صارم حاسم يقطع لسان اي شخص رافض اني افرح .. وافرح ، وده كان بيثير غيرة شخص تاني ، مش مهم يكون وحش لكنه عاوز يفرض سيطرته كباقي الاشخاص وده كان سببه اني بحس اني مش طايق نفسي ومخنوق جداً وبدون اي سبب ، او بدون سبب ظاهر ملموس

سنه رابعة صيدلة ..من اسوأ سنين حياتي اللي عشتها ، سنه تقيلة بمعنى الكلمة ، ليس هذا فحسب بل ان جامعة الازهر تأبى الا ان تضفي بصمتها على أيامي ودراستي فكانت الاسوأ بلا منازع ولم أبرح أرى جامعة الازهر قلعة للتخلف والجهل وليس لها مكان الا العشوائيات خاصة ان العقارات بمدينة نصر تساوي الألوف والملايين من الجنيهات وتلك الجامعة " واقول جامعة مجازاً لأنها تم ترخيصها تحت ذاك المسمى " تحتل مساحة ضخمة و اذا تم استثمارها في شئ ينفع ويجيب فلوس هيكون افضل بكتير من جمع تبرعات وشغل في المعامل بكيماويات انتهت صلاحيتها وبالتالي درجات امتحانات العملي تصيب من يتناولها بالتسمم! . محدش مذنب علشان انا دخلت ازهر ، والدي كان نفسي اكون شخص محترم حامل لكتاب الله ويتعامل بمنطلق الدين وارفع راسه زي مابيقولوا ، لكني وبفضل الله استطعت وبكل مهارة وقدرة ان ازيل بصمة ذاك المكان من على جبهتي حيث ان الازهري لما تراه يمكنك ان تميزه من العشرات ..والمؤسف جدا ان في ناس لازالت تظن ان الازهريين بياكلوا بايديهم ولما بيخلصوا أكل بيمسحوا ايديهم ف طرف الجلابية ، أو في الحيطة لو كان لسه لابس الجلابية من شوية ، في لسه ظنون بتفيد ان الازهريين متخلفين عقليا وانهم كائنات مينفعش تقولهم غير ..يااي
لكني فخور بإني بفضل اقنع اللي قدامي ان انا بالفعل متخلف ..آسف ف جامعة الازهر ..وده لأني اتعودت ان المكان اللي انا موجود فيه لازم ياخد بصمتي ، مش انا اللي اخد بصمته واتطبع بيه

انا طولت ..وعنيا بتقفل ، لكن لسه الكلام مخلصش ، انا جوايا كلام كتير عاوز اقوله ، لأني تعبت ومش قادر اخرج كلام جديد الا لما ده يطلع واكيد انتم لاحظتم اني في الفتره اللي فاتت تغيبت عن التدوين ورجعت بمعدل بطئ بتدوينات تتكون من سطر واحد .. اعدكم انها النهاية ولكن هاستأذنكم اطفي النور دلوقتي ..خلوني أحلم هاكتب لكم ايه المرة الجاية
بحبكم ...أوي

! وكم هي مخادعة

بحب الحياة بحب الناس - محمود سعودي

.

.

.. قد تكون الدموع سبباً في راحة الباكي

! لكنها كثيراً ما تكون سبباً في زيادة الجرح وعمق الآلام

! أيوة نحلم

بحب الحياة بحب الناس - محمود سعودي

.

.

ولو إننا ع الأرض عايشين .. لكن لازم ف يوم نبقى نجوم

! حبيبتي عمرها سنة

بحب الحياه بحب الناس

مدونتي تمت عام

كل سنة و إنتي طيبة و عقبال السنه رقم 100

.

و دلوقتي بقالي سنة بحبكم

:)

! عن احلامي

بحب الحياة بحب الناس - محمود سعودي

.

.

باحلم و عنيّا مفتوحة ، علشان ماشوفش دنيا غير الدنيا

ممكن اسأل سؤال ؟

بحب الحياه بحب الناس - محمود سعودي

سؤال بسيط اوي

هل فرض و واجب علينا حب الوالدين ؟؟

.

.

ارجو انك تقرأ السؤال كويس اوي اوي اوي.. قبل ما تجاوب

بحبكم

! لا مجال للهروب

بحب الحياه بحب الناس - محمود سعودي

.

.

قد يدعي البعض حب المسير في المطر وهو يبكون

... حتى لا يرى الناس دموعهم

ولكن الحبيب يميز القطره من دمع عين حبيبه بين انهار السيول

! ورجعت

بحب الحياه بحب الناس - محمود سعودي

من اواخر اللي فاكره وايامي اللي ماتتنسيش

طفل صغير ف ايدي صورتي وشايل مرايه

خدتني الدنيا ونسيت نفسي

ولما فقت..بصيت ف المرايه وشفت صورتي

ورغم ذلك...معرفتنيش

تعرف ايه عني؟؟

:)

بحبكم

! نلتقي بعد الفاصل

بحب الحياه بحب الناس - محمود سعودي

.

اشوفكم على خير...انا هاتوقف مؤقتاً عن التدوين بسبب الامتحانات

منتظر دعواتكم....واعذروني لو مقدرتش ارد

ممكن اغيب عنكم...وممكن حتى تتوهوا عن بالي

لكن اكيد انا...بحبكم

! عن التوهان الجواني

شكراً اماني التونسي

بحب الحياه بحب الناس -محمود سعودي

كنت تايه ف يوم ..ماشي لا بيّا ولا عليّا .."ولكني لا أهيم على وجهي " لأني كنت تايه..بس ماكنتش ضال الطريق ...ممكن تتوه و ده عادي لكن اوعى تتوه ف يوم من جواك اوعى تتوه عن نفسك و عن طريقك الجواني..طريقك اللي هيوصلك لمستقبلك..لأنك لو تهت عنه يبقى تهت عن نفسك ووجودك اصبح بلا معنى، ولكني اتحدث عن التوهان البراني....تايه وسط 80 مليون تايه

سألوني رايح فين؟..رايح فين؟؟؟؟؟ السؤال مش غريب ، ولا الفكره في اني أول مره اسمعه ..لكن المشكله اني فعلاً مش عارف انا رايح فين
صعب جداً ان الواحد يكون خارج من بيته و مش عارف هو رايح فين خاصة ان انا كنت مخنوق اليومين اللي فاتوا و بدأت تدريجياً أفوق شوبه ..قلت اسيب مخي يرسم طريقه بنفسه واهو حتى فرصه يفكر لوحده وارحمه من الضغط عليه...واسيب رجليّا تمشي مطرح ما هي عايزه ..بدأت رحلتي من المجهول الى المجهول عبر طريق مجهول لا يعرفه الا ذهني ويرفض رفضاً تاماً ان يطلعني عليه ...قلت يا مشوار دلوقتي بفلوس آخر السكه يبقى ببلاش ، مشيت وسط الناس ف شوارع مصر المحروسه في جو بارد معتدل وهو المفضل عندي على الاطلاق وتتهافت نسمات بارده كي تصطدم بوجهي فأحس بانتعاشه معها اتذكر كل لحظات المتعه التي مرت بي ... ثم تداخلت مع تلك النسمات بعض من عوادم سياراتها فامتلأ صدري منها فاحسست بخنقه ومعها رحت اذكر كل لحظات ضيق عانيت منها ..ولكن تعاود تلك النسمات الرقيقه لتهافتها في منافسه لاخراج ذاك الهواء المعدوم " المختلط بالعادم" فاستريح من جديد.
ولكني مع كل هذا لا اجد مكاناً ارسو فيه ..احسست بجوع يداعب امعائي ويخرجها عن هدوئها المعتاد فاستجبت فوراً ..استوقفني احد مطاعمها المفضلة لدي ..حيث كانت لي وقفه مؤقته من ذلك المشوار العجيب ..سندونشات طعميه وبطاطس اكلنا وشبعنا وبوسنا الايدين وشكرنا النعمه وحان وقت الساقع اكيد..كان ف جيبي فلوس كتير بس حبيت يكون مشواري "المجهول" النهارده مصري ابن بلد..حبيته يكون مصري اصيل..كملت الطريق ولسه مش عارف انا رايح فين بس سرحت وسرحت اكتر مع الهواء البارد ...لما شميت الهواء النضيف ، استريحت كتير...ولما دخل العادم في صدري اختنقت منه وسارعت اخرجه.. ولما جعت، اكلت وشبعت ..يبقى انا لسه عايش و بخير ويبقى كله تمام..عايز ايه اكتر من انك تحس ..وتسد اي نقص موجود...وعايز ايه اكتر من انك بتستجيب لأي حاجه تأثر عليك..عايز ايه اكتر من ان كله ..يبقى تمام؟؟؟؟...مشيت كمان لقيتني على الكورنيش شفت نيلها و مراكبها أخدت نفس عميق و قلت الحمد لله ..لسه عايش..لمحت بعيني مأذنه بصيت في ساعتي ومشيت لقيتني جوه جامع..صليت المغرب و سجدت لربنا و شكرنا على الصحه و الستر وان انا بخير..وان كله تمام

! سعوديات

بحب الحياه بحب الناس - محمود سعودي

.

.

وجدتني أقول وداعاً مع اني لن أغادر مكاني ولن يتركني أحد"

ولكني أحسست مؤخراً بأني سأفقد شيئاً أو شخصاً عزيزاً

فقلت ابدأ أنا بالوداع

" حتى لا أتألم من هول المفاجأه..أو عذاب الصدمه

! ورقه وقلم..كلاكيت تاني مره

بحب الحياه بحب الناس - محمود سعودي

الحقيقه الموضوع ده انا كنت نشرته قبل كده لكن انا بحبه جداً خاصة اني قدرت اعبر عن اللي جوايا فيه لأن الورقه والقلم بالنسبه لي مش مجرد اشياء موجوده في حياتي...انا نشرت الموضوع من تاني لأني مضغوط جدا اليومين دول و مش عارف أكتب جديد ومقدرش أغيب كتير عن المدونه ف نفس الوقت...اسيبكم مع الموضوع

-*-*-*-*-*-*

و بعد فترة ليست بالهينه قد قضيتها مع الكتابه ....يجب أن اعترف لكم عما بداخلي لتطلعوا على ما ضمر من أحاسيس و مشاعر.....لقد اصبح هناك عشق متوهج بيني و بين الورقه و القلم
بدايه أحب أشكر الأستاذ المحترم القدوة سيدي و أستاذ الناس كلها اللي ملهوش كبير........الأستاذ "القلم"!!...محدش يستغرب لأنه فعلا يستحق كل تقدير مع انه ثمنه رخيص بس معناه غالي قوي
القلم من وجهة نظري....هو القدوة التي يجب أن تحتذى في الطاعه و التضحيه..و يضرب بها المثل كمان

عارفين ليه ؟؟

القلم فضل انه يعيش طول حياته أخرس و ماينطقش بـ ولا كلمه ف سبيل انه ترك لك الفرصه للحديث وقتما شئت وأينما شئت ..عمره ما فكر انه يعصيك ف يوم و يكتب حاجه انت مش عايزها... و برغم كده انت بتستغل طيبته و تسب الناس و تقول غير الحق
القلم عاش طول عمره خدامك مستعد ف أي لحظه انه يكتب أي حاجه انت عاوزها و برغم كده انت مش بتهتم بيه و ترميه ف أي حته
القلم مثال رائع في التضحيه و الفداء بدليل انه ممكن بل اكيد بيستغنى عن دمه و شريان حياته اللي هو الحبر و هو كل ما يملكه هذا الضعيف، يضحي به من اجل ان تكتب انت و يظل يضحي بدمه حتى آخر قطره تستطيع انت ان تكتب بها و في النهايه يكون المقابل من حضرتك انك تزهأ عليه و ترميه بعد ده كله!!! يعني هو ده مقابل العطاء و التضحيه ..كده.. ده بدل ما تبكي عليه، ولا عشان هو رخيص و في منه كتير...للأسف فقدنا قيم كثير لابد و حتماً و لزماً ان تعود
أما ورقتي الحبيبه فهي النموذج الذي يجب ان يضرب به المثل في الأمانه و الإخلاص!!! برضه اوعى تستغرب
فالورقه كانت في الأصل ميته وما ان سقاها القلم بدمه حتى عادت لها الروح من جديد ناطقة بحروف خطتها يداك .... و هي لا تكذب أبدا و لا تقول إلا الصدق و ليس لديها مكان تخبئ به كلماتك فهي واضحه أمام عينيك ليس هذا فحسب فإنها الشئ الوحيد الذي تستطيع ان تأتمنه على أسرارك لأنها لا تفتن.. زي ناس..الى جانب انها تحافظ على ما أودعتها من كلمات مهما طال العمر ومهما مر عليها من الزمن...... ولن تجرؤ على أن تضيعه أو تطلع عليه أحداً غيرك و لكن كالعاده في النهايه...لا يكون جزاؤها منك إلا انك تقطعها أو تحرقها بعد ما تنتهي هي من مهمتها....ده بدل ما تبروزها ...ده بدل ما تشكرها..انسان بجد عجيب...طب انت ترضى ان رئيسك بعد ما تنتهي من مهمتك انه يفصلك من الوظيفه على الأقل ....ده لو خصم منك يوم ....هتعمل ثوره
ولكن في النهايه التي اوضحت من نحن و من هم الساده العظام ... الورقه و القلم..اقول لقلمي و لورقتي ما تزعلوش و انا عارف ان انتو بتعملوا ده من غير مقابل و لكن في هنا واحد بيقدركوا و عارف قيمتوا كويس قوي و ناقم على الجنس البشري من أفعاله الوحشيه دي....الواحد ده هو ..أنا
بجد ....يا ريتني كنت ورقه ،، يا ريتني أكون في يوم قلم

! سعوديات

بحب الحياه بحب الناس - محمود سعودي

.

.

في طريق الحياه الذي نسير فيه، لانختلف كثيراً عما نقود من سيارات "

حيث يسري علينا قانون واحد

فهي ان نفذ وقودها سكنت وامتنعت عن الحراك

وانت ان اتاك أجلك . . سكنت ايضاً

ولا يراودك فكر بأنها ستعاود الحراك اذا امددتها بوقود

فهي لن تسير بعد اليوم
"! لأن قائدها قد مات

سعودي،،،

! سعوديات

بحب الحياه بحب الناس - محمود سعودي

.

.

قلن: إن قلب الرجل فندق يسع الكثير من النساء ولكن واحده فقط هي التي تملك ذاك الفندق

.. وتتربع على عرش جناحه الخاص ، وأن المرأة لا يدخل قلبها إلا رجل واحد

قلت : أن الرجل تمتلأ عيناه بكثير من النساء .. ولكن لا يدخل قلبه إلا امرأه واحده

! وكذلك النساء

،،،سعودي

! بتحصل في احسن العائلات

ازيكم ...وحشتوني كتير جداً

انا معلش مشغول كتير الفتره اللي فاتت

ومش قادر اكمل بمزاج

بس ده موضوع عجبني اوي

هتلاقوه في

مدونه ..صور ريم

اضغط هنا...وشوفو الموضوع

وراجع قريب جداااااااااا

! وحشتيني يا مصر

تصوير- محمود سعودي

بحب الحياه بحب الناس - محمود سعودي

من كام يوم..كنت عند انين الناي...كانت كاتبه موضوع ولا اروع

موضوع رجعني لورا ييجي 15سنه...عن مصر

افتكرت لما كنت صغير و لسه طفل....لما كنت بقضي معظم وقتي في بيت جدي و جدتي

يااااه ايام متتعوضش ..حبيت اوي اتفرج على الناس ساعتها

الست اللي لسه صاحيه من النجمه ورايحه تجيب الفطار لعيالها

الراجل اللي خرج من بيته ولسه النوم باين على وشه

واللي واخد ولاده معاه ورايح يوديهم المدرسه

و الاطفال الصغيرين اللي رايحين الكتاب

مش ممكن...فين ايام لما كنت باقعد على باب الحاره واتفرج على اللي ماشيين في الشارع

فين ايام اما كنت باشرب الشاي مع جدتي في كوبايه واحده

فين ايام لما كنت باطلع معاها فوق السطوح ونأكل الفراخ و البط

فين ايام لما كنت بالعب مع ولاد الحاره بالشورت و الصندل و ابهدل هدومي

فين لما كنا كلنا بنتجمع في بيت العيله والعب انا وقرايبي على السلم و في الحاره

ولما نتجمع في رمضان في عمايل الكحك و البسكويت

فين لما كنت باروح الصبح بدري والحق جدي وهو بيفطر وافطر معاه

واشوفو وهو بيقرا الجرنان وبيقول حاجهت تضحكني

الله يرحمك يا جدو...انا بحبك اوي

وبعدين جدو ينزل الورشه بتاعتو تحت البيت..وانا اقف في البلكونه

اتفرج عليه و على الناس اللي معاه وعلى الناس اللي في الشارع

يااااااااااااااه....هي ليه لايام مينفعش ترجع لورا

انا نفسي اكون طفل من جديد

طفل لابس شورت و صندل...بيلعب في الحاره

مش حامل هم حاجه...فرحان انه في حاره من حواري مصر

جمهوريه مصر..التلقائيه ، اللي الناس كانوا فيها تلقائيين

ماشي في الشارع زي ماهو في البيت

وحشتيني يا مصر

يا مصر يا اصيله

! سعوديات

بحب الحياه بحب الناس - محمود سعودي

.

.

ليتنا ندرك الفارق الحقيقي بين القلم الرصاص والقلم الجاف "

فالرصاص تجده متعباً في العناية به، ويحتاج اهتمام دائم

ولكنه سهل التصحيح و التقويم بعد الكتابه

و الجاف لا يحتاج منك اكثر من ان تضعه على ورقة و تخط

ولكنك مسئول عما تخط وليس لك الرجوع فيه, الا الشطب

........

فياليت كانت تربيتنا ..بالرصاص

فليكن تفكيرنا بالرصاص..وكذلك قراراتنا

"! ولكن، لتكن تصرفاتنا....بالجاف

,,,سعودي

! سعوديات

بحب الحياه بحب الناس - محمود سعودي

.

.

أيامنا الحلوه..احنا سكرها "

أيامنا الصعبه..احنا مرارها

لأن ببساطه

" احنا الايام

،،، سعودي