!! و ف رمضان بنقوله حضرتك

بحب الحياة بحب الناس - محمود سعودي

.

إزيكم ... أولاً بجد بشكر من كل قلبي كل اللي بعتوا تهانيهم بالشهر الكريم و كل اللي اطمنوا عليّا ، وبجد انا آسف اني مقدرتش أرد لأني مكنتش حابب اتعمق ف الموود أكتر من كده ... ما علينا ، ده موضوع انا كتبته الشهر ده فمجلة كلمتنا عن رمضان .. يارب يعجبكم

= = =

انت جيت شهقة يا رمضان؟ ... نورتنا يابو صيام ! ، كل سنة و كل الناس اللي بتقرأ مجلة كلمتنا طيبين ، أما الناس اللي مش بتقرأ مجلة كلمتنا فهقول لهم كل عام وانتم بخير

بما ان رمضان بيهل علينا كل سنة ، وبما اننا كلنا بنتكلم عنه ..فأحب اقول لكم ان الموضوع ده مش جديد خالص ، وياما اتكلمنا عن رمضان واللي بيحصل ف رمضان وشكل مصر ف رمضان ، بس انا كنت قاعد سرحان كده ، وأعدت أفكر بقا ...لقيت ان في مهن كتير تقليدية .. لكنها بتأخذ شكل وطابع جديدين في الشهر الكريم ، ناس معينين ...بتنتظر الشهر ده من السنة للسنة بفارغ الصبر ، طبعاً مش الشحاتين ، لأن الشحاتين دلوقتي بقوا يشحتوا طول السنة ، دول حتى يمكن بيأجزوا ف رمضان ، أو بيحترفوا ف دول عربية ...وما شاء الله الشحاتين دلوقتي بقوا أغنى من الصيادلة ، ما علينا بلاش حرقة دم وماتخلوش الواحد يبوظ صيامه ف الصفحة دي ..العدد لسه طويل ، والمجلة لسه بخيرها.

بياع الفول .. آسف.. الاستاذ المحترم بياع الفول ، هكذا يكون لقبه في الشهر الكريم .. يتحول بكل بساطة الى بياع صاغة ولو انه لسه واقف بعربية .. ممكن يخلص إدرة واتنين في عدد قليل من الساعات خاصة بعد صلاة التراويح ، وشكل الناس وهم واقفين عليه بيبقى جميل أوي خاصة ان عربية الفول دي بتجمع ناس من كل طبقات مصر ، مفكرتش يوم كده ... اشمعنى ؟ ، طب ليه ؟ ، ازاي ؟ .. ده بيبيع فول يعني ومش جديد ولا حاجة ... وسبحان الله بعد أيّام تلاقي البياع بيدعى ربنا مايروحش البيت ولسه معاه فول ... هي ارزاق وربنا كاتبها وقاسمها ...ولازم نقول سبحان الله
بياع العرقسوس .. أو معالي بياع العرقسوس ، في الايام العادية ممكن تلاقيه بيجري ورا الناس في الشارع ، نفعنا بأي حاجة ياعم الحاج ، يا استاذ ... طب اشرب ببلاش قبل ما يحمض !... ولما يهل هلاله تلاقيه اصلاً معبي العرقسوس في اكياس علشان ينجز .. وبيبقى مش ملاحق ... بيبقى فيه ايه العرقسوس في رمضان عن غير رمضان ؟ ايه الجديد؟؟ ... هي أرزاق ... وبطل رغي بقى !؟

كنافة وقطايف ... انا نفسي مرة ف حياتي أكل قطايف في وقت مش في رمضان ... يعني باحلم كده ، والنعمة أتصور معاها عادي مش هاتكسف ! ... طوابير وخناقات وشد و جذب في الساعات اللي قبل الفطار قدام بياع الكنافة و القطايف ...مع انها لسه ( نيئة ) .. وفي لسه حوارات هاتتعمل في البيت علشان تستوي .. لكن رمضان من غير كنافة زي بالظبط شهر رمضان من غير قطايف ... وممكن تلاقي نفس الراجل ده بيعدي عليكم في البيت بعد رمضان بكنافة مستوية ومحشية بالبندق وبنص السعر وانت مش هاتفتح له أصلاً ... كنافة ايه دي اللي هناكلها بعد العيد !!

سبحان الله .. رمضان بييجي ومعاه رزق كتير أوي لكل الناس ، مهما كان مهنته ومهما كان اللي بيبيعه ، عاوز اقول حاجه كمان قبل ماتقلبوا الصفحة .. مصر في رمضان و العيد بيكون ليها طعم تاني ... بجد مصر ماتتعوضش في الفترة دي ، طبعاً باستثناء اللي ربنا كرمهم بعمرة رمضان ، لكن بكل أمانة مصر شكلها بيبقى حلو أوي في الوقت ده ، والله أحياناً بحس ان الهوا نفسه متغير في الفترة دي ، تحس ان الجو جو رمضان ، أنا بقول كده لأني مرة العيد عدى عليا و انا برة مصر ، حسيت بوجع جوايا ، ياللا... ربنا يديم فضله علينا ... وكل سنة وانتم أحلى الناس .. و رمضان عبد الكريم بيسلم عليكو أوي أوي أوي

:D

بحبكم ... كتير أوي