!!ومن هو اذاً ؟؟؟؟

بحب الحياه بحب الناس - محمود سعودي

اذا كنت وسط الجميع في سمر ثم اذا بك تحس بوحدة..مع انك لازلت معهم

.......
اذا احسست بكل راحه ولكنك فوجئت بما ينغصها عليك دون اي داع ملموس

.......
اذا كنت مرتاح البال و صافي الذهن ولكن تعكر ذاك الصفاء دون مقدمات

.......

ولكنك حين تغمض عينيك، فكان أحدهم أول من يطوف بخاطرك
فاعلم انه سبب تلك الوحده وزوال الراحه وتعكر الذهن الصافي
وهذا لأنه ليس معك....ليس بين يديك ولا امام عينيك
لأنه حبيبك...وقد صدق من قال عليه النصف الاخر
فالحب نقص...ولكنه احلى نقص عرفه الوجود
فاذا احببت يوماً ضاع نصفك..وما شعرت براحه إلا بحضرة حبيبك
الذي يمتلك نصفك الآخر
ولكن قد يكتم البعض ذاك النقص..ويستر عذابه من الوحده و كأن الحب شيم أو عار
يخجل من مصارحته بأنه محتاج اليه....محتاج لنصفه
!! وكأن الحب عيباً...يضرب فاعله بالسياط حتى الموت

انه نقص حقاً..ولكنه ليس مذله..ولا مهانة ابداً
فاذا كنت بجمع ... و تمنيت ان يزول ذلك الجمع الا احدهم ، فهوحبيبك و انت له عاشق
اذا كانت بك محنه وكان هو اول من لجأت اليه فهو الحبيب ايضاً
اذا فكرت بأحدهم طويلاً.. وظللت تتأمل ملامحه وكأنه بين يديك تلمسه
حتى كدت ان تكلمه...فهو حبيبك ولا مفر
اذا كان من شخص تتجاهله امام الجميع...وحين تنفرد به تمطره بحنان
فهو الحب لا محاله

فلا تتأخر عن ابداء مشاعرك...ولا تخجل...فاذهب اليه في اي مكان ..ريح عاصف او مطر جارف
اذهب اليه...وقلها بأعلى ما تملك من احساس...قبل ان يتولد الصوت من بين شفتيك..او دونه اصلاً
فبه السعاده بعد الحزن...وبه الفرج عند الضيق...وبه الصبر حين الاذى..وبه كل مواقف الحياه
ولتكن به و معه وله...أحلى حياه

بحبكم,,,,

!! دي راحت علينا خلاص

محمود سعودي - بحب الحياه بحب الناس

يمكن يكون البوست غريب شويه....بس بجد مش قادر اسكت

عانيت كتير الفتره اللي فاتت من حاله مش كويسه

خنقه...اكتئاب...كنت حاسس اني وحيد...ومش بلاقي حد اتكلم معاه و اشكي له

مش لاقي حد قريب مني يهتم بيا وعلى طول يسأل عليا

!! حسيت اني ولا حاجه ..على الشمال

ناس قالولي انت المفروض ترتبط والارتباط هو الحل بالنسبه لك

انا كنت فكرت قبل كده...بس لقيت انه مينفعش..حسيت اني لسه صغير جداً

ناس قالوا لي انت مش صغير و مش شايفين كده

! بس قلت دي مسئوليه كبيره....انا لسه باخد مصروف من ابويا

جالي رد...فعلاً عجبني...قال لي انت صغير على الجواز

بس مش صغير علشان تحب

فكرت تاني...قلت يمكن

يمكن يكون مش ارتباط...يمكن يكون ارتياح لشخص معين احب اتكلم معاه

ونسأل على بعض...ويمكن من الحاله دي يحصل تطور في العلاقه واحده واحده

خاصة وان الواحد قرب يخلص دراسه واكيد هييجي الوقت اللي يدور فيه على نصه التاني

قلت نفكر

و ف يوم...كنت باسمع اسامه منير...وانا فعلا بحب اسمع برنامجه جدا

بتعجبني دماغه جدا ..بغض النظر عن اللي بيتصلوا

كانت حلقه...عن المصارحه في الحب

!وكانت الصدمه على دماغي...كل البنات اللي بتتصل 18 سنه

يقول لها مرتبطه تقول له ..آه...وتشتكي من الشخص اللي بتحبه

!!!ان هو ..وان هو...يقول لها هو عنده كام سنه...تقول له 19 سنه

هي راحت علينا بجد ولا ايه؟؟؟؟؟

وهو مش بيستغرب ولا اي حاجه من الاعمار...دي طلبه ف ثانوي و أولى جامعه

لسه وراور....احنا خلاص بقا كده عدينا السن طيب ولا لسه فيه أمل؟؟؟؟

هل فعلا الاعمار دي من حقها تحب و تعيش في الجو ده ؟؟؟

ده على كده انا المفروض يعطوني علاوه تشجيعيه على الرهبنه اللي عشت فيها

عايز اعرف رأيكم في الموضوع ده...انتو بتحبوا..وحبيتوا امتى؟

وهل الحب له سن؟...وهل في أي وقت ييجي نفتح له الباب ونقول أهلاً؟؟

عايز كلام كبير...طلعوا اللي في قلبكم...انتو في مدونه الحبيبه الآن

بحبكم

! تاج مصري على رأس سعودي

بحب الحياه بحب الناس - محمود سعودي

هل توافق على حذف خانة الديانة من البطاقة الشخصية ؟

بالطبع لا..وهل وصلت الدرجه لأن استحيي من ديني؟

ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟هل لديك أصدقاء من المثليين ؟

لاتعليق عليهم...فهم مرضى يعانون من العمى ..رزقهم الله بخير فعموا و ضللوا

هي حريه و ليست شخصيه ..فليفعلوا ما يشاءون ولهم يوم يسألون فيه

هم ليسوا بالطبقه التي يلتفت اليها مهما كثروا..فأنا لست داعياً للشذوذ على أي حال

السؤال خاطئ..فلو اتخذت صديقاً لم يكن بالمثلي و لو كان كذلك ما كان صديقي

هل تعتقد بوجود إضطهاد للمسيحين فى مصر؟

لا....مش المسيحيين اللي مضطهدين

من هو الشخص الذى تختارة لرئاسة مصر ؟

الضمير اليقظ

اذا قمت بتأسيس حزب سياسى .. من هم الأشخاص الذين ستقوم بضمهم فى الحزب
ليشاركوك فى حكم مصر حال فوزك فى الإنتخابات ؟

لن أأسس احزاب...فسوف اجمع الشمل و لن....أأسس احزاب

هل توافق على مشاركة كل من : الإخوان المسلمين - الأقباط فى الحكم ؟

أوافق ان يكون كل منهم حاكماً لنفسه

فى رأيك الشخصى .. ما هى أفضل مدونة على بلوجر قمت بزيارتها ؟

كل مدونه يعجبني فيها شئ

لأن المدونه تترجم ما بداخل المدون

ولأني احب الناس..فأنا احب معظم المدونات

واحب مدونتي كثيراً

أيهما تفضل كزوجة .. امرأة عاملة ، أم ربة منزل؟

افضلها لها الحريه في الاختيار

وافضلها من اللواتي يردن اقامه بيت وتربيه اطفال بطريقه سليمه

فلتفعل ما تشاء لطالما أنها ستعطي كل ذي حق حقه

اذا تزوجت وأنجبت ولدين وبنتين .. أى الأسماء تحب أن تسمى ؟

الاولاد: مازن و زياد

البنات: فيروز و جنات

هل تعتقد أن توريث الحكم فى مصر . . سيتم فعلا أم لا ؟

لا يهمني من بابه

فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟

بجد دماغي وقفت بعد ما كتبت السؤال

ثم لمن تمرر هذا التاج ؟

أولاً لصاحب اي مدونه يمر هنا

ثانياً لهؤلاء اللذين سوف اذكرهم ولم يمرر لهم من ذي قبل

مصطفى فتحي - مروه عوض - اماني التونسي - ريم عادل - محمد شبل - هشام افندي- أسرار انثى - سهيل سعيد - السته بتوع صيدله - رحيق الحب -عصفور بلا أجنحه - ضي القمر

CHE - dr online - dr Roufy - UNIQUE - 3yoony - drop from the ocean

في النهايه بعد ما قرأت الموضوع ككل..لقيت اسلوبي غريب في الكتابه...مش متعود اني اكتب بالفصحى في المواضيع الخفيفه..ولكنني احسست ان فيها غلظه...يمكن عشان مخنوق حبتين اليومين دول...يا رب يكون كلو تمام

شكرا ل دودو صاحبه مدونه بارانويا على الاهتمام و تمرير التاج

بحبكم

اجمل ايام سعادتي

بحب الحياه بحب الناس - محمود سعودي

مش عارف اقول ايه و لا عارف اتكلم ازاي...هو دايما الواحد كده لما ييجي يتكلم عن اهم اسباب سعادته

بس يمكن يكون سبب سعادتي غريب شويه عن معظم الناس

انا بعشق حاجه اسمها الشتا...باموت ف المطر بجد

يااااااااه...انا فعلا بانتظر نزول المطر بطريقه غريبه

واحب اتفرج عليا من ورا الشباك و هو نازل على الزرع

او امشي في الشارع و هي بتمطر..و في وسط الشارع كمان

مش عارف اوصف اللي جوايا اكتر من ان انا بانسى نفسي في الجو ده

مش مهم اللي يحصل...مش عارف اقول لكم منظر الغيوم و السحاب مع المطر و الهوا البارد اللطيف بيعمل فيا ايه

انا طبعا مش كئيب للدرجه دي لكن السحاب و الغيوم انا بحب شكلهم جدا

و مش بحب ابدا اقف تحت حاجه في المطر مهما كانت قوته

لأن ده خير من عند ربنا....و بحب ادعي كتير في الوقت ده لأن الدعاء لا يرد فيه

و الغريب بقا اني احياناً بازعل لو الدنيا مطرت و انا نايم

شفتوا بقا بحبها ازاي؟؟؟؟؟؟

دلوقتي في منافس...لأني

بحب الحياه..بحب الناس..بحب الشتا

ايه ده ...انا لسه حي تصدقوا؟؟؟؟؟؟؟

بحب الحياه بحب الناس - محمود سعودي


وحشتوني بغباء
وحشتوني بهبل
وحشتوني بهطل

ستوب

ايه المعامله الزباله دي؟؟؟؟؟

ااه سوري معلش اصلي كان عندي امتحانات و لسه خارج م المستشفى...قصدي من القسم
يوووووه
انا خرجت و خلاص....هو قرف بره و جوه
هههههههه

انا عارف انا قعدت كتيييييير اوي بعيد بس كان غصب عني
انا رجعت ...و جاي اقول لكم انا راجع تاني ان شاء الله
ومعايا كلام كتير
انتظروني في هدومي الجديده...قصدي ثوبي الجديد

بحبكم ببشاعه و شناعه

!وليكن آخرها ..صوره

بحب الحياه بحب الناس - محمود سعودي

كل سنه و انتو طيبين يا بني آدمين
كل سنه و انا بحبكم اوي اوي اوي
كل سنه و دايماً احلامنا بنحقهها
كل سنه و احنا عايشين في سعاده
و ايجابيه

موضوع المره دي غير اي موضوع
هي فكرتي على العموم..ان آخر موضوع يتعمل في المدونه في العام ده يكون صوره
سواء اجمل صوره انت شقتها او صورتها

و دي من اجمل الصور اللي انا صورتها لطفل في السعوديه

الحقيقه..انا لما دققت في الصوره...بعد لما صورتها بكتير..لقيت فيها معاني
شايفين في ظهر الطفل...اتنين كبار...منهم من شاب شعره....و هو بالتأكيد مستقبل الطفل ده بعد سنوات
لكن الطفل اعطى ظهره لهذا المستقبل....و ابتسم الى الكاميرا
وكأن لسان حاله يقول
بحب الحياه...هاستمتع بيها....لحظه بلحظه

انا كمان بحب الحياه و بحب الناس و بموت فيهم

يا ريت كلنا نعيش لحظتنا و نركز فيها بس

وما نحملش هم بكره..طالما لسه في النهارده

يا رب يكون الموضوع عجبكم
و يا ريت اي حد عنده مدونه...يشارك معايا..وكأنها حمله

كل سنه و انتم طيبين..و ان شاء الله العام الجديد..يكون في ظهور أحسن ليا على المدونه

كلام عن شخصيات غير متوقعه
كلام كبير
كلام في الحب و الرومانسيه
خليك طبيب نفسك
انتظروني...قريباً
بحبكم...بحبكم اوي

باي باي 2007

! مجرد اطلاله

بحب الحياه بحب الناس - محمود سعودي

ثمة شئ في صدري يؤرقني...افسد على كل لحظات المتعه، ضاق به صدري و بدورها كانت حياتي على غراره

خرجت من بيتي اهيم على وجهي ابحث في الشوراع عن ملجأ التمس منه راحة ..لم اجد

كنت آمل ان تراني عيون فتاة مدللة فيقفز قلبي فرحاً لإهتمام غير معهود

أو أراقب قطرات ماء تتساقط برشاقه من السماء على اطراف ورق الاشجار فتتناثر بقاياها على وجهي و أحس ببردها

ولكن ما أصبت من ذلك شيئاً

رجعت الى بيتي حزيناً...أوكما انا ، فما كان من فرق

ظننت ان السجن في بيتي وما كان الظن في محله

اغمضت عيني...و أملت رأسي على الحائط و على وجهي طبقه من نور شمس طلت من شرفتي ايقظتني

!لم اكن نائماً..ولكنها ايقظتني من داخلي.....اخترق شعاعها صدري ليطلعني على ما بداخله فاذا السجن داخل صدري لا في البيت

مددت يداً كانت خائبه في يوم الى داخلي وامسكت به بقبضه من حديد واستخرجته من بين ضلوعي وسط آهات الألم و الفرح معاً

استخرجته و نظرت اليه في عجب....ثم استندت اليه بظهري فلمست راحة لم اعهدها على فراشة قطن أو ديباجة حرير

فإلتفت اليه في عجب و دهشه....و قلت مبتسماً بل ضاحكاً

تلك هي الدنيا..فيها تتخذ من نفس مواطن ألمك و عذابك ، مواطن أخري للراحة و التأمل

! خواطري....ابكي ، لعجزي عن البكاء

بحب الحياه بحب الناس - محمود سعودي

لقد عجزت عن الوصول اليها....بل انه قد ارهقني البحث عنها في داخلي ..ترى هل هي نهاية الاحزان؟ بالطبع لا ، و ان كان دافعي لكتابة هذا هو حزن و ألم عميق في نفسي
ترى هل فقدت الاحساس؟ لا اعتقد..و ان كنت استجيب للظروف و ابتسم و اضحك و اغضب.
أم هي لا مبالاه ؟؟ لا أعرف .... أين دموعي اذاً ؟؟؟؟؟
قد يكون هذا من جفاف نهر الدموع من داخلي ، هل جفت الدموع بالفعل ؟ ام هي نهاية الاحزان؟
و اذا كان البعض يبكي من الفرحه.... فهل هي نهاية الفرح ايضاً؟؟؟
الى اين السبيل؟؟؟ من اين آتي بالدموع اذاً ؟
يراودني احساس بأني جدار من الحجاره دونها ...أخذت ابحث في داخلي عنها فقلت اذهب الى قلبي مباشرة فهو خير دليل
وما ان وصلت اليه، حتى توقفت عن الرؤيه ولا استطيع ان ارى المزيد ...ما هذا؟ هل فقدت البصر؟
لا اعتقد فبمجرد ان التفت خلفي حتى وجدت شعاعاً من النور يأتي من الخارج حيث الناس و الدنيا
و ما ان التفت الى قلبي حتى تعطلت الرؤيه من جديد.....اذاً هو الظلام...نعم هو ظلام حال بيني و بين رؤية قلبي مجدداً ، سألت قلبي ماذا بك؟ و ما سر هذا الظلام؟ لم يجيب
كررت سؤالي....و ما من مجيب ، صرخت به....ولم يرد.......اقتربت منه اكثر...فوجدته ميتاً

يا للحسرة...مات قلبي ، اذاً انا ميت ، بالفعل
آآآآآآآآآه ...كنت اعيش في وهم كبير و بينما انا انعي نفسي حتى قاطعني العزاء...عزاء من عيوني....تعزيني الدموع
فقد انهمرت دموعي حزناً و ألماً على موت قلبي ...كانت دموعاً حاره ...وما ان سالت الدموع على وجنتاي و سالت على صدري، حتى ارتجف قلبي من حرارتها ..و نبض من جديد.. حيث عادت له الحياه بعد ان كان ميتاً...و سبب موته و حياته.......دموعي!

العيد فرحه...مااااااااااااء

بحب الحياه بحب الناس - محمود سعودي

" كل ثنه و انتم طيبين و كويثين و بثحه و ثعاده بمناثبه العيد"

كل سنه و انتم طيبين يا بني آدمين

بمناسبه عيد الخروف

و كل لحمه و انتم شبعانين

بحبكم

خلاص يا ناااااس...ربنا اعلن استقالته !!!!؟

بحب الحياه بحب الناس - محمود سعودي

ليتها كانت نهايه الدنيا......علها تكون قريباً قبل ان اسمع المزيد

هاهي الكائنه التي تدعى نوال السعداوي تطل علينا من جديد بعمل حقير " واطي " مستفز

تتحكم فيه في كل شئ... حتى اتتها الجرأه في قلبها الذي لا أعلم له حقيقه و يحول الشك بيني و بين وجوده لديها أن تتكرم على " الله " سبحانه و تعالى و تعطي له دوراً في مسرحيه قذره !؟

ذلك العمل الذي اطلقت عليه " الاله يعلن استقالته في اجتماع القمه"....و الذي شبهت فيه الذات الالاهيه المقدسه بالرجل العجوز ذو الستين من العمر و الذي كان لا يتحرك مطلقاً و يرتدي ملابس الملوك و من حوله الجنود و بجانبه انهار الخمر..و شبهت ابليس بشاب وسيم في الثلاثين...و بأن رضوان عليه السلام خازن الجنه - و التي ان شاء الله مش هتورد على ريحتها- بأنه السكرتير الخاص بالذات الالاهيه... الى جانب السب العلني المباشر الذي لحق بسادتنا من الملائكه و الانبياء دون أي رموز

ستوب يا كفر

هو في ايه...هو ايه مصبرنا...مستنيين لما يكون في اكتر من مثال من هذه النوال ؟ ولا منتظرين يكون السب علني؟

و هو في علنيه أكتر من كده؟؟؟؟؟؟

المفروض دي تعدم..دي بتسئ لربنا يا جدعان...لربنا...لربنا؟؟؟؟

يا نهار اسود....يعني خلاص مفيش أي عقل....و فين دورنا...أقل واجب يكون موقفنا زي مدبولي صاحب دار النشر اللي اصدرت الكتاب ده و اللي اعدم جميع الكتب قبل ان تنشر و قال مش مهم اتكلف كام ...المهم ما اغضبش ربنا

نفسي كل مصر تكون مدبولي.....و تحرق أي حاجه تتعلق بالنوال دي

بس في النهايه كله بأمر الله...و اكيد الوقفه هتكون قريب...و قدام عينينا و ربنا يثبتنا و ننصر دينا و ننصر ربنا و ندافع عنه لحد اخر نفس

هي ايه حكايتي مع المقابر؟؟

بحب الحياه بحب الناس - محمود سعودي

انا مش عارف مالي في ايه؟.....بقالي فتره كده كاره حاجات كتير في الحياه و ناقم و حاسس بالسلبيه بتجر فيا

هو كل الناس كده؟..ولا الدنيا اللي اتغيرت؟.....ولا انا عندي مشكله و أنا مش حاسس بيها؟

أنا بقالي فتره ..حتى مش عارف ان كانت كبيره ولا صغيره...برتاح نفسياً لما بادخل المقابر أو اتفرج عليها في أي طريق أو اشوفها و خلاص..حتى لما كنت في السعوديه حسيت بحاجه كده غريبه لما دخلت مدافن البقيع بد بجد انا نفسي ارجع السعوديه تاني و اقضي فتره هناك في مدافن البقيع

انا حتى عارف عدد المدافن اللي بعدي من عليها و انا رايح الكليه بالعربيه كل يوم

و ليه المقابر بالذات ...دي مفيش فيها أي صوره من صور الحياه اللي انا بحبها

هل يمكن علشان هاكون متأكد ان مفيش فيها حد بيخدع حد..و محدش بيداري ورا ظهروا و بالتأكيد كل الناس اللي فيها ميتين و محدش بيتظاهر انه ميت؟

هل يمكن لأن المكان ده خالي من عادات البشر السيئه؟

هل يمكن لأن انا اتغيرت و بقيت مش بحب الحياه؟

ولا...في حاجه هتحصل؟

ولا دي علامه ان انا قلبي خلاص مات...و المفروض ان انا اراجع نفسي لأن مفيش حد بيستريح في المكان ده ..و ده مكان للاتعاظ فقط و ده دليل على ان انا في ف قلبي مشكله؟

طب هو انا لوحدي كده؟....ولا في حد زيي كده؟

طب سؤال.......هو أنا طبيعي؟

قريب،، قريبا،، عن قرب ....بس قول ان شاء الله

بحب الحياه بحب الناس - محمود سعودي

قريباً ان شاء الله

في شكل جديد...و حركات جديده و .....كله جديد ف جديد

انتظروا

في ........؟

في كلام أطفال مايقولهوش الا الكبار

يا ترى هو اييييييييييييه؟؟؟؟

سؤال و ليس اعتراض ....ولم الحساب اذاً؟؟؟

بحب الحياه بحب الناس - محمود سعودي

سؤال يراودني منذ صغري و الى الآن
لا أعلم له اجابه...بل يرهقني التفكير فيه حتى اجدني امام المئات من علامات الاستفهام التي لا حصر لها
لماذا يحاسبنا الله يوم القيامه مع ان كل شئ يفعله العبد يكون مكتوباً و معلوماً و قد قدره الله له و هو في بطن امه؟؟؟؟
السؤال، بل القضيه هنا تتعلق بكون الانسان مسير أم مخير

هو يعني ايه مسير و يعني ايه مخير؟؟؟؟؟

و ازاي انا مسير أو مخير؟؟؟؟

أم ان المعاصي تكون غير مكتوبه..و حينما يعصي العبد يعاقب على ذلك؟؟؟؟

بجد مش عارف

يعني ببساطه

الواحد لما يسرق ، مش هو كان مكتوب في صحيفة اعماله عند ولادته أنه سيسرق في يوم كذا؟
طب كيف يدخله الله النار و هو كان مكتوب له هذا؟؟؟؟؟؟؟

الناس الصالحه كلها اللي بتعمل خير، مش ربنا كان كاتب لها انها هتعمل اعمال خير في الايام الفلانيه؟
طب علام يدخلهم الله الجنه و هم كان مكتوب لهم هذا؟؟؟؟؟؟

انا لما بفكر دايماً في الحكايه دي بحس ان انا تايه...حاسس ان في شئ غامض

اصله مش معقوله يكون حد بيعمل حاجه ربنا -سبحانه و تعالى- مش عارفها و بعدين ربنا- عز و جل- عاقبه على معصيته..ده خارج نطاق العقل اساساً
ولا احنا مالناش لزمه في الدنيا دي...بمعنى ان كل ما حدث و يحدث و سوف يحدث كان قد قدر و ها هو الآن يٌعرض؟؟؟؟؟؟؟؟
انا بس محتاج أعرف فين فرصة الطاعه و المعصيه؟؟؟؟
حد عنده جواب......حد يقنعني؟

سؤال غلس..سخيف..و رخم تسمحلي اخنقك؟

بحب الحياه بحب الناس-محمود سعودي

يمكن يكون بوست مالوش لزمه،لكن هاكتبه ..الى معشر المدونين

يمكن اكون فهمت الموضوع غلط طيب

او اكون غلطان يمكن..محدش عارف

هاسأل سؤال...لو حد خنق عليك ف المدونه هتعمل ايه

اكيد هنقابل ناس معانا و ناس محايده و ناس مش عاجبها اسلوبنا
و لكن ..ماذا بعد تلك المقابله

نمشي ازاي؟.....هتكمل في طريقك؟..ولا ترضيهم؟

و هل المطلوب مني في المدونه اني ارضي الناس؟ ،و لا اعبر عن نفسي؟

لازم اكتب باللغه العربيه الفصحى و اراعي ما يراعيه الاخرون في نشرات الاخبار و اللقاءات الرسميه؟

المطلوب مني اني ما اهزرش؟.. و اشوف كل واحد عاجبه ايه و اعمله ولو فيه حاجه مش عاجباه اشيلها؟؟؟؟

سؤال كمان.....و ده زي ما اتهمني احدهم في البوست اللي فات و شوفوه في التعليقات

لازم يكون اسلوبي غايه في الرسميه و مفردات اللغه تكون فصحي خالصه؟ لازم اتكلم في المدونه زي ما باتكلم مع حد كبير

م الاخـــر

لو حد مش عاجبه مدونتك...هاتتجاهله و تكمل في طريقك و تعبر عن نفسك؟...ولا هاتشتمه و تقول له انت مالك ..كده وش؟

هاتقول له مالكش دعوه ..بالذوق؟...هاتحاول تعمل معاه حوار و تتوصل لحل و تغير من اتجاه مدونتك و تغير من اسلوبك و ترضيه ..و بعدين تغيرعلشان ترضي واحد غيره؟؟؟؟

طيب هي المدونه معموله ليه اساساً...عشان تتخنق فيها؟..ولا علشان تفضفض؟

يمكن اكون مش محتاج اجابات...بس نفسي الناس اللي بتعلق تكون تعليقاتها ايجابيه و عارفه هي بتقول ايه

يمكن أكون محتاج اعرف يعني ايه مدونه

وبالاحري يجب ان يعلمها قبلي اصحاب التعليقات السخيفه.... الذين لا اعبأ بهم

شكراً

بحبكم

صباحوووووووو 2

بحب الحياه بحب الناس - محمود سعودي

هاي..ازيكو

وحشتوني جدا جدا جدا

انا كنت متوقف لفتره علشان كان عندي امتحانات كتير

ياللا محدش واخد منها حاااااااااااااااجه

المهم

دي صوره كده من تصويري ع الماشي

اكيد طبعا لا تعليق...لأ غلاسه بقى في تعليق

كلمه الصحراوي مكتوبه الصحرواي

فكرت..اللي كتب الكلمه دي كده مش راجل اهبل يعني ولا مؤاخذه

وبعد طول البحث و التفحيص و التمحيص

وجدت في اللغه الانجليزيه كلمه في غاية الروعه

ان واي على وزن

WAY

طريق يعني

شكلك فاهم يا نصه

الراجل مش بيهزر يا جدعان...صحرواي يعني الطريق الصحراوي .....يخرب بيت جهلكم

حسبي الله و نعم الوكييييييييييييييييييييييييييييييييييييل