محمود سعودي - بحب الحياه بحب الناس
يمكن يكون البوست غريب شويه....بس بجد مش قادر اسكت
عانيت كتير الفتره اللي فاتت من حاله مش كويسه
خنقه...اكتئاب...كنت حاسس اني وحيد...ومش بلاقي حد اتكلم معاه و اشكي له
مش لاقي حد قريب مني يهتم بيا وعلى طول يسأل عليا
!! حسيت اني ولا حاجه ..على الشمال
ناس قالولي انت المفروض ترتبط والارتباط هو الحل بالنسبه لك
انا كنت فكرت قبل كده...بس لقيت انه مينفعش..حسيت اني لسه صغير جداً
ناس قالوا لي انت مش صغير و مش شايفين كده
! بس قلت دي مسئوليه كبيره....انا لسه باخد مصروف من ابويا
جالي رد...فعلاً عجبني...قال لي انت صغير على الجواز
بس مش صغير علشان تحب
فكرت تاني...قلت يمكن
يمكن يكون مش ارتباط...يمكن يكون ارتياح لشخص معين احب اتكلم معاه
ونسأل على بعض...ويمكن من الحاله دي يحصل تطور في العلاقه واحده واحده
خاصة وان الواحد قرب يخلص دراسه واكيد هييجي الوقت اللي يدور فيه على نصه التاني
قلت نفكر
و ف يوم...كنت باسمع اسامه منير...وانا فعلا بحب اسمع برنامجه جدا
بتعجبني دماغه جدا ..بغض النظر عن اللي بيتصلوا
كانت حلقه...عن المصارحه في الحب
!وكانت الصدمه على دماغي...كل البنات اللي بتتصل 18 سنه
يقول لها مرتبطه تقول له ..آه...وتشتكي من الشخص اللي بتحبه
!!!ان هو ..وان هو...يقول لها هو عنده كام سنه...تقول له 19 سنه
هي راحت علينا بجد ولا ايه؟؟؟؟؟
وهو مش بيستغرب ولا اي حاجه من الاعمار...دي طلبه ف ثانوي و أولى جامعه
لسه وراور....احنا خلاص بقا كده عدينا السن طيب ولا لسه فيه أمل؟؟؟؟
هل فعلا الاعمار دي من حقها تحب و تعيش في الجو ده ؟؟؟
ده على كده انا المفروض يعطوني علاوه تشجيعيه على الرهبنه اللي عشت فيها
عايز اعرف رأيكم في الموضوع ده...انتو بتحبوا..وحبيتوا امتى؟
وهل الحب له سن؟...وهل في أي وقت ييجي نفتح له الباب ونقول أهلاً؟؟
عايز كلام كبير...طلعوا اللي في قلبكم...انتو في مدونه الحبيبه الآن
بحبكم
27 comments:
اولا
احب اهنيك علي اسلوبك الجميل جدا في الكلام اللي كل يوم عن التاني بتقدم بدرجات عاليه بجد
اما الموضوع فهو روعه ويمس كل حد فينا
وانا هاجاوب ع اسئلتك
علي اعتقادي انا
هل فعلا الاعمار دي من حقها تحب و تعيش في الجو ده ؟؟؟
والله محتار جدا جدا
مش عارف من حقها ان يكون سن 19 او 18 ده الواحد فيه يبدأ يفكر فيه عن حبه وشريك حياته
بس
من راي ان السن المناسب اللي يدور فيه علي حبه هو السن اللي يكون فيه قادر علي تتويج حبه ده بالرباط الشرعي ولا فايكون اشد العذاب
...انتو بتحبوا..وحبيتوا امتى؟
بس الحب عاده بيجي فجاه كده وده استحاله تحسبله وقت تقول انا هاحب لما يكون عندي 23 او 24
لا استحاله
ومش عارف بقي الواحد حب ولا لائه
هو ممكن اعجبت بس
بكتييييييييييييير
اساسي بنت الجيران واساسي البنت اللي معاك في الدروس
المواصلات
الجامعه
بس اظن ده اعجاب بس
بينتهي بالوقت
بس
الصراحه
اول حب استحاله يتمحي من القلب
وانا عن نفسي اتنمي تتويجه
شكرا علي الموضوع اللي هايقلب عليا المواجع ده
موضوعك جميل يا محمود زى كل مواضيعك
انا مش عارف اقولك ايه بجد .. بس متهيألى اى حب بيجى فى الفترة دى من العمر .. من 16 الى 20 سنة مش بيبقى حب بجد .. الواحد او الواحدة شافولهم كام فيلم اجنبى او عربى وشافو ازاى البطل ف اخر الفيلم بينقذ البطلة ليفوز هو بقبلة النهاية .. طبعا فيلم واحد بس اللى نستثنيه من الموضوع ده فيلم قنسطنطين لانه فى اخر الفيلم مش قبل البطلة ولا حاجة :D
لكن نرجع لموضوعنا .. فيبتدى الـ Teens يحسوا ان عندهم فراغ عاطفى عاوزين حد يحبوه ويحبهم .. وطبعا اليك ان التفكير فى اغلب الحالات بره العائلة لان دول واخد عليهم وواخدين عليا .. هو بيبقى عاوز او هى برضه بيبقوا عاوزين حاجة جديدة .. حاجة مش شافوها او جربوها .. والدليل على كلامى روح لاى ولد قوله ايه مواصفات فتاة احلامك وش هيديك مثال بفنانة .. وروح لاى بنت ايه مواصفات فتى احلامك هتديك مواصفات فنان .. ده لو ماكنش براد بيت زى ما احنا متعودين :D .. فانا رأيى ان اى حد بيمر بالحب ده .. لكن مش هو ده الحب الحقيقى اللى انت ممكن تكون بتدور عليه او اى حد تانى
الحب معناها اكبر من انى اتصل بحد كل يوم علشان اطمن عليه .. او انى اقابله او.... الخ
معنى الحب عميـــــــــــق جدا لابعد الحدود وصعب انك تقدر تفهمه بسهولة .. فمش تتوقع من حد لسه بياخد مصروفه من ابوه - الكلام مش عليك علشان انت بتقفش على طول :P - يقدر يحدد الحب او النزوة من بعض ..
وانا رأيى الشخصى ان الحب ده عند الـ teens مش بيبقى اكتر من نزوة كلهم هيمروا بيها (وان كنت انا سبقتهم:D) لكن الواحد اتعلم الدرس وبيحاول مش يكررها وبجد اتأكد انك هتقدر فى يوم تلاقى الحب اللى انت عاوزة واللى انت تقدر تكمل وتبنى حياتك معاه
ياااااااااه كل ده انا كتبته :D يارب يبقى عندك وقت بقى تقراه
وفقط للعلم
ده مجرد رأي
او رأي مجرد
لا اكثر ولا اقل :d
سلام
انا متجوز
وش مكسوف
و الله انا جيت ارد لقيتنى عندى 18 سنه قلت اخدها من قاصرها و اسكت احسن
:(
امممم
18 سنه دى يعنى تانيه كليه تقريبا
كلنا 18 ماعدا سنفوره 17
اما بقى بالنسبه للخنقه وعلاقتها بالحب مش حاسه ان الاتنين مرتبطين ببعض
ومش كل حب بيجيب سعاده
ده غير انك لو دورت على حب ولاقيته يبقى ده مش حب حساه اكتر اشباع لفراغ عاطفى وبعد فتره الاحساس بيتغير
مش عارفه بس ده راى
هاى يامحمود
الموضوع ده مش لذيذ خالص على فكرة لانه شكله فعلا راحت علينا (وش بيعيط اوى وبحرقة )بس انا مش فاقدة الامل اوى كده انا حاسة وانا باخلص فى ال60 ممكن الاقى فارس احلامى بس اكيد مش هيكون راكب حصان ابيض (حكم السن برضه) بس لموضوع الحب فى سن 18 سنة والكلام ده انا بشوف انه ممكن فعلا يكون حب بجد بس اعتقد أن الاغلبية بتكون مجرد اشباع لفراغ عاطفى اى حد اكيد عانى فى فترة منه
المهم فى الموضوع لو حد صرفلك العلاوة التشجيعية دى ماتنسانيش النص بالنص
احلى سلام ليك
انا بعرف بنات عندهم 17 سنه ومخطوبين وكمان سنة راح يتزوجو
بس الحب مش من عمر لعمر وما بنفع احنا نجيبو وهو بيجي لحالو كمان مش شرط لو كان عمرهم 16 او 17 او 18 ان الحب مش حقيقي
بالعكس المهم الطرفين شو نيتهم يحبو ولا يضحكو على بعض
واكيد كل شي نصيب
وما في حدا بتروح عليه
ان شاء الله تحب وتنحب وتشوف ان اخرة صبرك اشي عظيم
دمت بود
روري
الأمــ اليائس ـــل
اشكرك حقيقي على رأيك و ذوقك
وربنا يوفقك و تتوج حبك
بحبك
dicart
أولاً منور المدونه لأنها اول مره اتشرف بيك المره دي و يارب دايما اعجبك و اعجب كل الناس
ثانياً..احييك بشده على اهتمامك وافاضه الرأي...وبجد كلامك كله صح
بس انا مش باقفش بسرعه يا أمور...لو كان للصبر حدود...فأنا حدوده
بحبك
مصطفى فتحي
بس دي مش حجه يا حبيبي علشان ماتتكلمش ماتخافش مش هافتن زي كل مره
بحبك و بموت فيك
Sa5soo5ty
استني يا دكتوره رايحه فين
مجتش عليكي يعني..ارجعي و احكيلي
تحياتي ليكي
Loza
بصي يا دكتوره هو العلاقه هنا غير مباشره ممكن يكون بسبب الوحده او الانعزال او ظروف معينه فده بيكون كحل وسيط وده رأي برضه بس رأيك اكيد اصح من رأيي
وفعلاً كلامك صح...تحياتي
Totaaa
مش لذيذ ليه بس ده حلو و زي العسل اهو؟؟؟؟؟
بس انتي متفائله و عندك امل اهو ...60 سنه؟؟؟ ده انتي حياتك وردي بشكل
:D
تحياتي ليكي يا توتاا
meto & roree
أو روري...زي ما تحبي
اولاً دي أول زياره ليكي في المدونه و بجد منوراني و كلماتك حلوه جدا و اشكرك عليها بس المشكله هنا
ازاي حدا عنده 17سنه او 18 و يتزوج و ازاي هيقدر على تكاليف الزواج
انا حاسس ان السن ده لا زال سن تعلم و اكتساب خبرات ...رأي مش أكتر
وكلامك حلو كتير
تحياتي
حبايبي اشكركم على اهتمامكم
ودايماً نكون مع اللي بنجبهم عايشين حياه هادئه و مستقره و معوضه عما فات
بحبكم....اوي اوي
هاى محمود
باشكرك بجد على الموضوع ده مع انه مش جديد لكن يهم كل الشباب خاصة الرهبان اللى زى حالاتك
المهم انا رأييى ان الحب فى السن الصغير اللى انت قولت عليه 99% بيكون لملئ الفراغ العاطفى وعشان الواحد بيبقى عايز يحس الاحساس العجيب اللى كل الناس بتحلم بيه بس فى حقيقة انا عارفاها كويس :عمر الانسان ماهيلاقى الحب الحقيقى طول ما هو بيدور عليه
اما عن سؤالك :انتوا حبيتوا ؟وامتى ؟
الحقيقة انا مجربتش يا باشا انا باسمع بس !!
نوسة
ازيك يامحمود
بوست عسول ..
متهيألى الحب ملهوش علاقة بالسن ، بس ده مينفيش ان الصغيرين (ادى كده) مش هيبقوا حكما اوى فى قرارات حياتهم المصيرية كلها ومنها اكيد قرار انهم يرتبطوا عاطفيا بشخص معين ، بس ده ميحرمهمش من انهم يدوسوا ف الدنيا عشان ينضجوا ويعيشوا سنهم بالحدود اللى متخليهم يضروا نفسهم .. ربنا يخليلنا اسامة باشا منير :)
مقاييس الحب الحقيقى مفيهاش : ان يزيد عمر المحب عن 21 سنة اى لا يكون قاصرا... لكن ده مينفيش بردو ان المراهقين بتبقى مشاعرهم مش مستقره ومش عارفين بالظبط هما عايزين ايه.
وبردو متهيألى مينفعش حد يدور ع الحب او انه يقرر يحب ، هو بس يفتحله قلبه و يستناه وهو ان شاء الله هيجى ..
يللا ...عندك فرصة شهر ، بعد شهر ادخل الاقى اسم البلوج "بحب الحياة... بحب الناس ... بحب (..) "، بعد كده تبقى راحت عليك ياجميل :):)
وبلاش بقى الاكتئاب ده الحل ليه انك تحب نفســـك (مش تحب علـى نفسك) ..اوقات الحب ومشاكله اكتئاب اكتر وممكن امراض نفسية تانى وممكن تتطور لامراض عقلية ، انت عارف كده طبعا بحكم خبرتك مع منير ..ربنا يعافينا :)
بى هابى :)
تحياتى
صباح الخير ياسعودي
....
الحب نوع من تخيلنا إن لم يكن موجودا علي الارض اخترعناه
....
موضوعك سهم وصاب هدفه تسلم ياسعودي
...
انا رأي المراهقين الي هما 18 او 19 الحب بالنسبة لهم صحي اقصد لازم يحبوا من بعيد لبعيد
ولو حصلت تجربة الحب ممكن يخسروا حاجات كتير
بس الاصح الحب من بعيد لبعيد في السن ده
...
سعودي الحب مالوش مكان ولا زمان ولا بيجي بالتخطيط
يعني تصحي من النوم تقول انا هحب النهاردة
لا القلب هو الي بيتعلق فجأة بحد فبيدخل في مود الحب
وممكن العين هي الي تحب وممكن الاذن وممكن الروح تتعلق بحد وممكن كل ده نوبة واحدة
انا طبعا بحب ومش هنكسف اقلها دي اجمل حاجة.. بس ده لا ارداي
طبعا اجمل حاجة الحب بس اوحش حاجة كمان لانه كله الم وعذاب وخوف ومشاعر كتير بتناقض بعض تحس بأمان وخوف تحس بلذة وتحس بألم وهكذا
بس بيقولوا الذ ما في الحب عذابه
....
....
عارفة الناس هتقول مفروض الانسان يحب شريكة حياته .. بس انا مش بقتنع بده لان الحب ده جوانا صعب جدا نتحكم في مشاعرنا
ورأي ان طالما محدش بيعمل حاجة غلط يبقي نحب طالما مش بنضحك علي غيرنا ولا بنخدع ايه الي يمنع
...
انا بتمني الي بحبه يكون من نصيبي وهو كمان بيتمني ده وبنحاول يبقي حبنا مشروع عن طريق الافصاح عنه لاهلنا وكده عشان منحسش بغلط
...
يارب يحفظك ياسعودي وتعيش وتحب بإذن الله يبقي احلي حب وترضي بيه ربنا ميكنش فيه ما يشين
ربنا يكرمك
دودو
سعودي
انتظر تعليقي بعد الجمعة لان النت كان فاصل ولسه راجع حالا
تشي
سعودي منير
قصدي سعودي باشا
اولا ازيك
ثانيا بقي البوست
الخنقة الاكتئاب الوحدة امراض مستعصية ومعرفلهاش دوا ولو تعرف بما إنك فى صيديلة ابقي قولي بس عموما دا المنتشر فى السوق الايام دي ومش حالة فردية ولا حاجة فعادي شوية وهترجع احسن
انك مش لاقي حد يهتم بيك ولا يسأل عليك مش معناه انك محتاج ارتباط لا معناه انك تدور فى الناس اللى حواليك على حد ( صديق) يبقي معاك على طول يسأل عليك على طول ممكن تقول انتيم يعني مش لازم ارتباط عاطفي يعني
كمان ملكش دعوة بكلام الناس الارتباط ملوش دعوة بصغير ولا كبير بس ليه انا مستعد ولا لأ وكمان الارتباط احنا ما بنمهدلوش هو بيجي كدا فجأة تصبح الصبح تلاقي نفسك بتحب ومرتبط وبتعد النجوم فى عز الضهر ( ابقي قولي هيطلعوا كام )
وكمان بص الحب والارتباط ملهومش دعوة لا بالدراسة ولا بالعمر فى ناس بتحب وتتجوز فى التلاتين وناس خمسة وعشرين وناس بتتجوز من غير حب خالص وفى ناس ما بتتجوزش علشان ما بتلقاش الحب يعني دور على نفسك عايز تكون فين ما تستعجلش الحب اهم حاجة
وولاد 18 و19 يحبوا ميحبوش ليه يعني بس المشكلة يعرفوا منين حب بجد ولا حب تقضية وقت دي مشكلة كبيرة وبيقعوا فيها بس الحب لكل الاعمار فى كل الازمان وفى كل مكان معليهوش قيود ابدا
وبلاش حكاية راحت علينا علشان لما تقول كدا هتبقي قاعد مستعجل مترقب مستني الحب يجي وكل لما تحس باحساس غريب تقعد تسأل نفسك هو انا كدا بحب وفى الاخر يطلع مش حب تكتأب بقي وتضايق تلاقي احساس جديد نفس الحكاية ودا مش هينفع لكن خلي باب قلبك موارب وسيبه ومتفكرش فيه لغاية لما تلاقيه لوحده حد ( قصدي حده ) زقه ودخلت وقعدت وعملت قصر كبير جوا وبقت هى اميرته وملكته والحاكمه بأمرها داخل جدران مملكة قلبك خلى الملكة دي تيجي وتحتله اجمل احتلال واطول احتلال لكن مش كل لما تشوف واحدة تدعوها تدخل تجرب حظها ( فهمت حاجة !!:D )
اجاوب على اسئلتك الاخيرة
هل فعلا الاعمار دي من حقها تحب و تعيش في الجو ده ؟؟؟
اكيد من حقها وكل حد من حقه حتى لو التجربة فشلت هتبقي تجربة للمستقبل والحب مش حجر على حد او على سن معين
عايز اعرف رأيكم في الموضوع ده...انتو بتحبوا..وحبيتوا امتى؟
اكيد بنحب فى كل وقت من ساعة ما بقيت ليا تفكير مستقل بحب بحب ربنا وبحب نفسي وبابا وماما :P
وبحب الحب اللى تقصده فى البوست بحب بكل الطرق والاشكال علشان زي ما سمعت كدا بيقول مسكينة تلك القلوب التى تبحث عن الحب
وكمان بيقولك قد نسته الحياة من لم يداهم قلبه الحب
ومعناه اننا هنفضل نحب طول عمرنا واللى ميحبش يبقي مش عايش او ع الاقل دا رأيي
هل الحب له سن؟
لا انظر عاليه
هل في أي وقت ييجي نفتح له الباب ونقول أهلاً؟؟
لما تكون شايف انك مستعد ليه ومش هتظلم الطرف التاني او هتأذيه بالعلاقة دي يبقي اهلا وسهلا ومرحبا وكل حاجة كمان
استمعت بالكومنت دا وانا بكتبه
تحياتى
تشي
بصراحه فعلا بقت حاجه غريبه ان الواحد بيلاقى الناس وهما لسه فى ثانويه عامه عايشين قصص حب
بس مش للاسف عمرها مابتستمر
لان اصلا المشاعر فى الوقت دة مبتكونش مستقرة اطلاقا وشويه وبتتغير
ماظنش ان مفروض الواحد يسمح للحب يدق بابه فى الوقت دة
علشان لما نحب يبقى حب صادق وبجد ويستمر طول العمر
تعالو زوروني
http://shababshow.wordpress.com/
enas
كلام معقول
drp frm da ocean
اشكرك بشده على تعليقك
وماتخافيش انا هابي
:)
وممكن نخليها لو عايزه
بحب الحياه..بحب الناس...والفراوله و الاناناس
تحياتي
paranoia
الله عليكي يا دودو
ربنا يحفظك
كلام كبير كبير
CHE
فينك يا ابني
ماعلينا
فهمت طبعا يا كينج
بس صدقني اسألتي ليها مغزى تاني
وتسلم ايدك يا عسل
ضي القمر
كلام موزون..وعاقل بصحيح
مصطفى فتحي
كلنا معاك
2na 2wel mara 2zoorak begad modawentak foo2 el raw3a ya reet teb2a tezorni fe blogy el motawad3
sn0wna
begad ba7yeek
;)
الحب ملوش سن
دور حواليك
و لو لقيت الى ترتاح معاه و تحب صحبته خليك معاه على طول
تحياتى
اول مرور ليا
Snowna
اول زياره ليكي تشرفني ..وياريت تنوريني دايماً
واشكرك بشده على رايك الجميل ده
المدونه حلوه بيكم كلكم
RANIA
رايك كويس وعين العقل
منوره المدونه باول زياره ومتتأخريش عننا
Snowna w rania
زوار جداد....ومنورين بجد
تحياتي
بجد انت زي العسل
وفجرت موضوع مهم جدا جدا
انا برضة كنت عايز اتكلم فيه
اولا مش معني ان تحس ان محدش بيسال عليك او ان محدش بيفكر فيك دة معناه انك صفر وانك علي الشمال
وانك لازم ترتبط
والي قالك كدة غلطان جدا جدا
انت ممكن محدش بيسال عليك لان الي حواليك مشغولين بظروف اكبر من ظروفك
ويمكن لانك مش في الوقت الي يتسال عليك فيه اويمكن انك معملتش الي عليك بطريقة كافية ومرضية للي حواليك علشان كدة محدش كلمك ومحدش سال عليك
وعلي فكرة دي مش وحدة احياننا كتير بنحس اننا في وحدة وبيكون احساس كاذب
امابقي موضوع الحب في سن متقدم من العمر دي حكاية كبيرة عايزة كلام كبير
اكيد الحب ملوش سن ايوة
بس انا واحد من الناس شايف ان موضوع حب ال18 سنة دة دي مشاعر مراهقة بتتولد وبتكون بكمية كبيرة وبطريقة تقدر تقول صعب النحكم فيها مما يدفع الشخص الي تصريف هذة المشاعر في اي اتجاه
مثلا يحب لعبة او مكان او حيوان اليف
او او الي اخره ولكن كل الي ماشي دلوقتي في البلد مع وجود الهجمة العلمانية علي الاسلام والافلام الخبيثة المدسوسة علي شباب المسلمين وغسيل الدماغ الي بيحصل لهم كل ثانية
بالتالي لازم يقلدوا الي في الافلام دي ويعملوا زيها وبيداوا في تصريف مشاعرهم بالطريقة الي انت شايفها دي
ودة السبب الي بيخلي كل العلاقات دي تموت وتفشل بعد حين من الزمن بعد ما المشاعر المتوهجة دي تنطفي وتخمد نيرانها الملتهبة ويكتشف المراهق او المراهقة ان حبه للطرف الاخر كان كله لعبة او مفيش حب من الاساس
علي العموم مدونتك جمسلة جدا
وكلامك اجمل
نورتني بزيارتك واتمني ان تتكر
واسف جدا علي التطويل
عبدالرحمن
لما فكرت ارد بأية
لقيت نفسى بسال سؤال هوة انا اصلا عندى كام سنة
تقريبا كدة عشرين
وفكرت تانى هوة المفروض يكون اجابتى اية فى السن دة
لقيت ان اجابتى اننى لم اتقابل معة حتى الان
تقريبا كدة انا من طريق وهوة بيلف الناحية التانية
بصراحة حسيت انى حد ناقصة شىء يمكن
لكن الحكاية دى مش مسببة لي اى ازمة بالعكس
انا فخوووووووورة جدا
ان قلبى لم يجرحة احد
متقولش بقى الحب الصادق الجميل الرقيق دة مش بيجرح
مفيش اى عاطفة الانسان بيستمتع بيها الا وتلاى مشاكل حواليها
ياما جرح
او فقد
او فراق
او........
او طبعا علشان مبقاش سوداوية اوى
بينتهى بالزواج طبعا الى بتكون نهايتة نهاية الحب
او بردو بدايتة بدتية المودة والرحمة الى ربنا سبحانة وتعالى قال عن العلاقة الزوجية دى (وجعلنا بينهم مودة ورحمة)
والى كتير من ابناء الزمن دة مش عارفين ان اساس العلاقة بين اتنين هوة تواجد العاملين دول
ارجع واقولك فعلا انا مبسوطة يكفى انى لو صدفة سمعت الاستاذ اسامة منير مبفكرش اتصل بية
هههههههههههه
.........
ربنا يرزقك كل الخير يااخى
حاول تتامل فى الناس كدة هتلاقى مايشبغع شعور الوحدة ....صدقنى شك هتحس بيها كتير من الوقت
الحب مش امتى وفين وازاى
الحب كدة وخلاص
لانك لو فكرت وخدثت قرار بانك تحب دلوقتى
مش هيبقى حب هيكون مجرد عاطفة ممكن تختفى مع اختفاء عوامل الحاجة
واعتقد ان انجح حب هو الذى ياتى بدون
منجيبة بالعفية هيكون صادق اكتر
ومتزن
منورة مش كدة
ممممممممممم انا اتكلمت كتيييير
انا اسفة بس سرحت
بس فى حاجة نسيت اقولها
لو انت حاسس بحالة اكتأب جامد
حاول تتعايش جدا مع الحالة دى
اختبر قدرتك على التحمل يأخى
علشان تقدر تتأقلم على حالة الحب الى ان شاء الله ربنا ييسرلك بية
مع السلامة
Abde Ra7maan & Nour
بجد اشكرك على ذوقك و رأيك الجميل ده
ولبدا انا استمتعت فعلاً برأيك
بحبك
SoSo
متقوليش اسفه يا سوسو
لأن اصلا انا عايزكم هنا علشان تسرحوا و تطلعوا اللي ف قلبكم
ع العموم رايك ف منتهى الروعه
تحياتي
اشكركم بشده على انكم قلتو كل اللي نفسكم فيه
كان اللي انا عايزه اني اطلع اللي جواكم وآخد رايكم في الموضوع مش اكتر
وانا سعيد اني قدرت اوصل لقلوبكم و كنت موفق اني اعرف اللي بتفكروا فيه
بحبكم
بجد ..بحبكم اوي
جيت عل الجرح ياخويا
كم كنت أتمني أن يصبح الحب مثل علب الزبادو في السوبر ماركت يشتري ويباع وبصلاحية وبأنواع كثيرة
او انه يكون حاجة ابوك بيدهالك لما تكبر وتجيب مجموع يدخلك كلية حلوة
ولكن للأسف فهذا الحب تظل تبحث عنه وتفتقده بجميع حالاته مهما مر عليك الزمان واختلف المكان
الحب ليس له عنوان او سن او زمان
الحب اللي بجد تحسه قبل الاوان
تحسه لما تبقي بجد انسان...ولو مكنتش انسان عمرك مهتعرف تحب
الموضوع وما فيه باختصار
اننا دائما وابدا بنخلط بين الحب والارتباط والزواج...وامثالك ممكن جدا يكون من النوعية المحترمة
اللي هما مش بيقدروا يرتبطوا غير لما يحسوا انهم مسئولون من الالف للياء علي الطرف التاني
وبما انك لسه بتاخد المصروف من الحاج سعودي ..ولسه بتتعلم
فأصير كمان شوية واستحمل معلش
كلها سنة ياعم وتتخرج ويطلع عينك في الجيش ان شاء الله كده
وبعدين يطلع عين عينك بقي في البحث عن شغل وتثبيت اقدامك في الحياة
استني انت هتبقي كام سنة كده
قربت علي التلاتين
يلا ياعم حاول تفكر في الارتباط بقي
ليه تحب وتتجوز بدري لما ممكن تحب وانت كبيررررررررررررررررر
تحياتي
وتذكر دائما
ان
الحب في التلاجة
هشام صفوت
hosham afandi
اشكرك بجد على التحفه اللي اتحفتني بيها
انت بتجيب الكلام ده منين؟؟؟؟
والله بحبك
Post a Comment