محدش فاهم حاجه خاااااااااالص

انت ممكن تسمع خبر...و ممكن تصدقه او لأ

لكن انك تسمع خبر...وبعدين...هو انا لسه هاحكي

بص يا معلم

سمعنا مؤخرا نية حنان ترك و سامي يوسف في اصدار مجله دينيه و التي كان من المفترض بداية نشرها في شهر رمضان الجاري و لكنه تم تأجيل النشر لموسم الحج لدراسه الموضوع من جميع جوانبه خاصة و انها تعتبر التجربه الصحفيه الثانيه لترك بعد التجربه الغير ناجحه والتي كانت عباره عن مجله " نونه" للأطفال و التي توقف اصدارها لعدم وجود الدعايه الكافيه لذلك

عجبتني الفكره دي قوي...خاصه بعد ما التزمت حنان ترك و لم تستقر هي حاليا على الاعتزال ام اكمال المسيره و لكن اكيد هتكون في طريق جديد محدود و حسيت ان هما عندهم رساله بيحاولوا يوصلوها بشتى الطرق سواء بالتمثيل أو الصحافه أو الطرب

و من خلال متابعتي لهذا الموضوع كل ما وجدته بالفعل هو اخبار عن تأجيل الاصدار

و كانت الفاجعه الكبرى حينما اتطلعت على احدى صفحات موقع ف البلد حيث كانت تصريحات قتلتني

تبين لي ان الموضوع كان فشره كبيره...بس كبرت قوي و وسعت جداً

حيث أكد وسيم ملاك مدير اعمال سامي يوسف أن سامي يوسف لا ينوي مطلقاً عمل اي شئ من هذا و ان هذا الكلام لا اساس له من الصحه مطلقاً و ان سامي لم يتفق مع اي أحد على اي اصدار مجله او شئ من هذا القبيل سواء في مصر أو في اي مكان بالعالم و ان هذا ليس من اولوياته في الفتره الحاليه!!!!!!!!!!!!!!!!!70 مليون علامه تعجب و دهشه

الله يخرب بيوتكم......هجس و فشر فظيع

انتو فاضيين ولا ايه...بجد حل فظيع للبطاله..و احسن و اسرع وسيله للدعايه و الاعلان

دي مش بس اشاعه...ده الموضوع محبوك حبكه منيله.....و اتأجل بقى عشان كذا و كذا و الشغل هيكون في موسم الحج.....ده ناقص يعملوا هم مجله بنفسهم و يحطوا عليها صور و اسماء ترك و سامي بمقالات وهميه..... و عيش بقى

ربنا يستر...ده ناقص اصحى الصبح الاقي سامي أو ترك بيهاجموني و يطالبوا برقبتي ،لأن أنا تابع لجهه معاديه من شأنها التشويش على الدعايه لاعمالهم الفنيه الجديده...و تطلع فشره برضه ف الاخر

و يجعله عامر

كاميرا ف الموبايل

المره دي مش هاقول كلام

و مش انا اللي هاتكلم اساساً

الصور هي اللي هتتكلم

انا هاوي تصوير و مش محترف

بس باعشق الكاميرا

ها ها.... و هي كمان بتحبني

من تصويري

و لســــــــــــــــــه...انتظروا المزيد

باركولي....و هنولي

مع بداية عام دراسي جديد

ومع استقبال عام جديد من العمل

لأول مره....و باحمد ربنا من كل قلبي

EVENTS تم تكليفي بأن أكون المنظم للجنه الاعلاميه و منظم الـ

في الكليه و اتحاد الطلاب

و ده لأن الكليه شافت نجاحي في مجله كلمتنا

و ده بفضل الله طبعاً

و عشان كده قررت يكون في تعاون بين الكليه و بين مجله كلمتنا

و المجله رحبت بكده و ده طبعاً.....لأن

كلمتنا.....في حياتنا، و جامعتنا

كفايه بقى....هتغرقوني ..حرام عليكم

مش عايز اسمع كلمه زياده....بجد خلاص طهقت

الكل بيتكلم ف الدين...و الكل معاه دليل

و احنا اللي بنغرق في النهايه

و مالكش عـذر....بس فين الصح

امشي ورا مين

اذا كان كلام النبي اصبح موضع خلاف

انا حضرت درس...و قال الخطيب انا آسف...ربنا يغفر لي

الحديث اللي انا قلته امبارح كان حديث موضوع..و النبي (ص) برئ منه

الكلام صح و كل حاجه و فعلاً النص سليم "مليون ف الميه" لكن النبي ما قالش كده

حلو قوي لحد كده....؟

و انا ف خطبة الجمعه.....سمعت الخطيب يذكر هذا الحديث لأنه له علاقه بفضائل الاعمال في رمضان

و بعدها قاله في درس في صلاة التراويح

قلت ياد انت دلوقتي في رساله ولازم توصلها يمكن الشيخ ده وقع في خطأ زي الشيخ الاولاني

و بالفعل رحت و اتكلمت معاه..و هو كان مرحب

بس جاب لي كتاب "تقيل " في الحديث الشريف و الحديث مش موضوع

احب انبه بس اللي ما يعرفش يعني ايه حديث موضوع

هو كلام تم انسابه للنبي (ص) و النبي لم يقوله و هو مبرئ منه

حتى لو كان ده كلام صح و سليم زي الحديث اللي انا باتكلم عنه

قلت له طب في كتاب تاني طيب ممكن نستفسر منه....؟

قال لي دور....!! ادور؟

المشكله انه حد انا احترمه..ما علينا و لكنه سألني

اللي قال الحديث ده ملتحي؟

قلت آه....قال لي سيبك منهم

هما كده بيحرموا حاجات و بيسمعوا وخلاص

سمعوا حاجه من الشيخ الفلاني ..خلصت " و الكلمه خنقتني بس سكت" في اهم م الرد عليه

ازاي يترد كلام العلامه ده...هو في حد احسن منه في الحديث

ده بينزل الخير لما يذكر اسمه؟

قلت له انا بجد مش عارف ..انا سمعت كلام و لازم ابلغه ..دي عن النبي

انا بجد كده تائه...طب اصدق مين؟

قال لي بجد انت صعبان عليا و الشباب كلهم صعبانين عليا

محدش بيقرا..الكتاب قدامك اهو..احكم

قلت له انا بجد مش عارف...انا معنديش علم

انا حسيت اني لازم اقول حاجه...لأن عاقبة نقل الاحاديث الموضوعه مش سهله

ما تسألش يا بني و ماتدورش..و ماتبلبلش دماغك

قلت طب أنا هاسأل الشيخ الاولاني اعرف جاب الحكم ده منين

قال لي اسال...و ماتجبش ليا رد...انا معايا الدليل بتاعي

هو في حكم بعد الشيخ العلامه ده!!!!........مين؟

انا هاشد ف شعري

نيجي هنا يقولوا لنا هناك

و لما سالته عن الغناء و الاستماع للموسيقى

قال لي الغناء كالكلام...حسنه حسن و قبيحه قبيح

و الموسيقى؟....قال لي ما هو نفس الكلام

يعني انت شايف ايه؟...قلت له انا اصلا بحب الغناء و الموسيقى

بتريحني و كده بس مش بتثير شهوتي ولا حاجه

بس مش كل حاجه احبها هتبقى حلال اكيد

قال لي خلاص...و بعدين في موسيقى بيعالجوا بيها دلوقتي

و دي انا اعرفها بالفعل

و سيدنا عمر بن عبد العزيز كان بيتعلم الموسيقى

مالها الموسيقى....في حين ان رأياً اخرا قد سمعته يحرمهما قطعياً

طب اصدق مين؟

طب اروح فين؟

لما انا عايز اتعلم

و عايز اعرف

اعمل ايه ؟؟؟

بس خلاص..محدش يفتح بقه بكلمه

انا عارف انا هاعمل ايه

مش عايز تأليف و حياة ابوكم

هتضيعونا الله يهديكم

كل واحد معاه دليل يخليك تقتنع مليون ف الميه

انا بقى مع نفسي و ربنا هيلهمني

ان شاء الله

بيب بيب اهلي.... بيب بيب اهلي

هاااااااااااااااااااااااااي

ازيكو.....انا مش هتكلم كتير

انا بس جاي اقول

مبروك لكل الأهلاويه

مبروك كتير للأهلي

رغم ان المباراه كانت غريبه في بعض المواقف

فبدايه هي مباراة قمه ....من غير اهل قمه...لأنهم لعبوا المباراه وهم لا يحتلوا المركز الأول

ثانيا ان فوز الاهلي فيه شك عشان تسلل ابو تريكه...و نلاقي بكده

ان الحق جاء من غير اهله ...و ضاع من أهله..عشان ضربة الجزاء ضاعت

بس ماليش دعوه، أنا مش متعصب، بس الأهلي حديد و يستحق الفوز

يستحق الفوز

و نستحق نفرح

بدون تعصب

الزمالك...حظ أوفر....مش بنشتم ولا نعيب

الزمالك لعب حلو قوي

....و

الأهلي حديــــــــــــــــــــــــد

اضحكوا المساجد كي يبكوها

كان المسجد خاوياً

يبكي من الوحده

حتى اتوه جميعاً

ففرح بهم شديداً

و رحب بهم...و وسعهم و لم يعبأ بالزحام

بل احب الزحام و عشقه

ثم هجروه فجأة

فبكى ثانيه

ثم جاءوه بعدها بعام

فضحك من جديد

حيث رمضان من جديد

.............

اكتب تلك السطور....و انا من داخلي قلب المسجد افرح ايضاً و الله لفرحه

و اكاد ابكي لبكاءه

اصف لكم صلاه الفجر من أول يوم في رمضان

ادخل المسجد....مفيش مكان لقدم

الفجر!!؟؟؟؟ اللي كل الناس بتكون نايمه فيه!!؟؟

ما شاء الله

فرحت قوي

الأيام تعدي....يوم ورا يوم...رمضان بيخلص

على آخر رمضان ...الناس اختفت!!!!؟

في ايه؟

الناس راحت فين

طب كانوا في الأول كتير ليه

حد يجاوبني و يريحني

حد يعرف؟؟؟

طب هي الناس دي مسلمه بجد ولا.........؟

محدش يعرف

هم بينافقوا.....ولا ايه؟

و بينافقوا مع مين؟....مع ربنا؟

استحاله

يمكن مع نفسهم....او ممكن بيضحكوا على نفسهم

و لا يمكن اصلاً هم بيعبدوا رمضان

و لا عشان مكانوش مستعدين كويس للعباده في رمضان

و لا عشان ايه بالظبط....انا تعبت من كتر السؤال

حد يفهمني....و يا ريت يقنعني

انا باعشق منظر الناس و هي بتتزاحم على الصلاه

بحس ان الدنيا لسه فيها خير....و الناس عندها خير مالهوش حدود

و بافرح قوي لما اروح اصلي في مسجد و مالاقيش مكان...و اروح اصلي في جامع غيره اكبر

بافرح قوي بجد....لكن

بازعل قوي برضه.....بقى ده ينفع

نسيب المسجد وحيد بيبكي....بعد ما خليناه يضحك من كل قلبه

كده....طب ليه...مين اقنعهم مايجوش المسجد تاني

حد يريحني....بجد انا تعبت

بدل ما كان نفسي كل يوم يكون رمضان........لأ

نفسي كل يوم يكون....... أول يوم في رمضان

قلوب رمضانيه

سلامو عليكو

ازيكم...عاملين ايه

وحشتوني موووووووووووووووت

كل سنه و انتم طيبين

رمضان كريم عليكم

عايز أقول حاجه

هو الأول...يعني ايه رمضان ده

مش شهر ؟

آه

و مش باقي الشهور بتاعت ربنا؟

أكيد برضه آه....بس

ده...شهر في عرض خاص...زي أوكازيون كده

مش انت لما بيكون في عرض على أي حاجه و عليه خصم ...بتجري عليه؟

و اهو جت لك الفرصه لحد عندك

اوعى تعتبر رمضان على انه بوابه...أو محطه......تعديها و خلصت

اوعى

و انا كمان بقول الكلام ده لنفسي....دي فرصه

مش هتتعوض ...يا عالم مين يعيش

خد رمضان ده على انه نقطة بدايه

درجه سلم......و كمل طلوع بعد رمضان

انا باندم قوي و بازعل على نفسي انا بجد بكون كويس قوي في رمضان

و بعد رمضان ......مش هاقولك

انا مش بانحرف ولا حاجه ...انا الحمد لله على علاقه كويسه بربنا و لله الحمد

لكن في رمضان بكون أحسن

و نفسي دايما اكون احسن

مش هتفرق كتير في المجهود اللي هتعمله.........النيه بس

بس هتفرق كتير قوي عند ربنا و في الثواب

صلي قبل رمضان و في رمضان و بعد رمضان

و البسي الحجاب قبل رمضان وفي رمضان و بعده
احنا بنعبد ربنا......مش بنعبد رمضان

رمضان ايام...و بيموت...و ربنا دايما موجود

يا رب اهديني...و تقبل مني...و خليني من الصالحين..و حبني......و حبب الناس فيا

كل سنه و انتم طيبين و يا رب يكون كل ايامكم رمضان و كل يوم و انتم بصحه و سعاده و قريبين من ربنا

كلام القلب

حينما تجد الشخص الذي يتقن لغة قلبك

حينما تطير اعلى من السحاب...و لكنك ما زلت على الارض

حينما تنتقل من عالمك ....و انت ما زلت على مقعدك

حينما تحلم اكثر الاحلام ورديه......و لكنك لا تزال مستيقظاً

حينما تزداد نشاطاً بعد تعب شديد.....دون دواء

حينما يخلو بالك من كل المشاكل و أي تفكير.....و لكنك لا زلت بعقلك

حينما تتمنى ان تقعد مكانك دهراً........و لكن دون اي ملل

و حينما تغلق كل حواسك و تتعطل بأمر منك كي تعمل اذناك باتقان وكي تصب في قلبك مباشرة

اذاً انت تستمع

و لكن

ما هذا السحر الذي تستمع اليه

ما هذا الذي يغير من داخلك دون واقع ملموس

هل هو سحر بالفعل؟

لا ليس سحرا....... و لكنه

ذلك الشخص الذي يملك يدا بها اصابع ليست كاصابع باقي البشر

ذلك الشخص الذي يحمل دكتوراه في امراض القلب و دوائها

ذلك الشخص الذي حينما تستمع اليه تفقد ما فات من حياتك

و بعدما تستمع اليه لا تستطيع التفكير في اي شئ

فقط لا تريد الا ان تظل هكذا...مفتوح العينين ..مبتسماً

بجد ....استحاله تفكر في اي شئ

انا متأكد

انا جربت

انا رحت حفلة عمر خيرت في دار الأوبرا المصريه
و اللي فات ده هو نتيجة تجربتي

كنت هناك..... انا و فريق كلمتنا

حيث انطبقت علينا مقولة الداخل مفقود و الخارج مولود

ايوه....اللي انت داخل بيه ده... هيموت منك..هيضيع....و هيتولد جواك شخص جديد

او يمكن هيتمسح مخك.....و يتولد ليك فكر جديد

او يمكن هتستمع جدا بموسيقى عمر خيرت

كلمة حق ولازم تتقال

لا تكذب.....ولا تتجمل

يوم ورا يوم.....في كل مكان ....بنقابل ناس

و الناس دي منهم اللي كويس ....و منهم اللي مش كده

فكرنا كتير في ظواهر الناس......و اخلاقهم

و من كتر تفكيرنا في الموضوع ده....اصبح في حساسيه في المعامله

عارفين ليه؟

لأن احنا للأسف عايشين وراء أقنعه....صح؟

دايما بنحاول نثبت للي قدامنا ان احنا أحسن منه

دايما عايزين نظهر اننا أعلى في المستوى الإجتماعي

دايما نتكلم بطريقه لا تدل مطلقا على شخصيتنا

دايما بنظهر بصوره لا تمت الينا بصله

ليه بنتبرأ من نفسنا ؟

ليه مش عايزين.."إحنا"و ندور على حاجه غيرها ؟

مع ان احنا في الأصل مش وحشين

لأ...تصدق فعلاً احنا وحشين

أيوه وحشين....و وحشين أوي كمان

اقولك ليه؟

لأن احنا دايما نبص في ايدين غيرنا

لأن احنا دايما مش راضيين باللي في ايدينا

لأن احنا دايما بنبص فوق

و عمرنا ما بصينا تحت

دايما نبص فوق و نقول عايزين

و عمرنا ما بصينا تحت و قلنا الحمد لله

طبيعه طماعه....لا يملأ فمنا الا التراب

و ليه بنحاول نظهر للي قدامنا اننا عندنا و عندنا و عندنا

ليه مش بتظهر بطبيعتك

ليه محاولتش في مرة انك تكون شفاف

جرب كده.......خلي الناس تفهمك و تعرفك لما تبص في عينك

اتصرف بره البيت كأنك بالظبط قاعد في حجرتك

ما تخبيش حقيقتك ورا ظهرك

صدقني في كلتا الحالتين هتخسر

لأن ممكن اللي انته مخبيه ده يكون شر....تتكشف حقيقتك و تقع على دماغك

و برضه ممكن تكون انت ظالم نفسك و مخبي انسان كويس......بس معندكش ثقه في نفسك و مش عايز تكون نفسك

اوعي تكذب في يوم من الأيام.....و أوعى تتجمل كمان

اوعى تخدع حد ......و اطلع من وراء القناع

الناس مش بأهلها ولا فلوسها...الناس بنفوسها

و خلي بالك....أول حد هيتخدع....هيكون انت

لأنك في يوم هتقف قدام المرايه....هتشوف حد غريب

حد ماتعرفهوش......و هاتتكبر عليه زي باقي الناس

و اللي انت ماتعرفهوش....ان تكبرك ده خنجر مسموم تزرعه انت في صدور الناس

لكن للأسف هتفاجئ بالخنجر ده في صدرك انت و ساعتها مفيش فايده من الندم

طلع اللي جواك .....و اوعى تخاف

اوعى تكذب.......اوعى تتجمل

رحله الى عالم الغموض

انتظروني قريبا

انتظروني قريبا....احكي لكم عن تفاصيل رحلتي الى عالم غريب...مع انه موجود من عشرات السنين

عالم بين الابتسامه و الدموع

بين البساطه و بين اللاشئ

اناس لا يحلمون......وان كانوا بالفعل ينامون

بعدها ايقنت ان سماءنا......هي كعوب اقدامهم

فهم افضل منا بكثير

نعم....بكثير

انتظروني

على صفحات مجلة كلمتنا

برضه مش هخاف

سؤال عجزت عن اجابته......و لكن

كل انسان ناجح....عارف هو عايز ايه ...نفسه يكون ايه.......عايز يطلع زي مين

ايه...... انت قلت ايه؟؟؟؟؟........آخر حاجه قلتها ايه؟

هو انا قلت حاجه غلط لا سامح الله ولا حاجه

آآآآآآآآآآآآآآه نفسه يطلع زي مين....القدوه يعني

مممممم......القدوه هو حد كويس انا عايز اكون زيه.......صح؟

تصدقني ان انا لحد دلوقتي مش لاقي قدوتي؟

ايوه مش لاقي قدوتي ..............بس في حاجه كمان ...انا متعمد ملاقيهاش اصلاً

م الآخر مش عايز قدوه م البشر

هافهمك كل حاجه بالتفصيل

انا متعود دايما افكر بطريقه جديده...ماشي؟

هو مين اللي اخترع موضوع القدوه ده؟

مين اللي حط التعريف بتاعه؟

مين اللي قال انه لازم يكون شخص حي أو كان شخص حقيقي كان موجود؟

أكيد كانت وجهة نظر.....حتى لو الكرة الأرضيه كلها اجمعت عليها

ف الآخر هي ايه......كانت فكره او اقتراح و بني عليها بالاجماع......صح ؟

طب مش اللي عمل التعريف ده ....بشر انسان زينا؟

آه

طيب يعني انا كمان ممكن اقول رأيي ف الموضوع ده

و أنا شايف ان ممكن مايكونش قدوتنا ده من البشر اساساً

ليه يكون قدوتنا حد بيغلط....يعني اكيد فيه نقص

يعني اكيد مش كامل الأوصاف .....أكيد مش بيعمل كل حاجه صح

اكيد عنده نقطه بيضعف عندها....و كلنا كده "قبل ما تقول اي حاجه" أنا عارف كويس

ليه مانفكرش ف موضوع القدوه ده من ناحيه تانيه....من زاويه مختلفه....من وجهة نظر جديده

و ليا الحق ف كده

أنا عن نفسي اقتدي بالمثاليه...أقتدي بالكمال

أيوه أنا شايف ان كلمه قدوه دي حاجه كبيره قوي....و أحيانا تكون كبيره على بشر باستثناء الرسل و الأنبياء

جرب كده تكون قدوتك كل حاجه كامله.....مفيهاش اي نقص ولا عيب...ولا سلبيه

ممكن...بنفع.....و ليه لأ......ليه مفكرناش كده

ليه ماتحطش قدوتك 100% بالتمام و الكمال

انا عن نفسي قدوتي المثاليه

النقطه التانيه...من اللي هيبقى في المثاليه دي؟؟؟

بصراحه؟

أنا

أنا قدوتي......هو أنا

هتقول انت مجنون رسمي

هاقولك انا عاقل رسمي....بص يا سيدي ......بصي يا سيدتي

أنا شايف نفسي في المستقبل أحسن واحد ف الدنيا......مش سوبر مان يعني ولا حاجه

مش احنا اتعودنا على انك لما تعوز تكون حاجه....اعمل حدود فوقها....علشان لو نقصت تلاقي نفسك في المكان اللي انت كنت عايزه؟

طبق الكلام ده كده في مسأله القدوه.... و جاوبني انت بنفسك

....

....

عرفت بقى....عمرك ما هتبقى أحسن واحد في الدنيا.....لكن كل ما طموحك يزيد....كل ما اللي انت بتوصل له يزيد؟

طيب ماتخلي طموحك اعلى ما يمكن ...علشان توصل لاكبر ما يمكن؟

اكيد دلوقتي فهمتني....صح؟

انا بقى شايف نفسي ف المستقبل حاجه كبيره قوي...و ها جري وراها و هاحاول احقق اللي اقدر عليه على قدر الامكان

و مش كله...بس اكيد هيكون اكبر من لو كانت قدوتي حد زيي زيه

ايه رأيك لما تكون قدوتك كل حاجه صح.....و كل نجاح....و كل نجوميه

دي حتى هتحفزك أكتر يا شيخ

مممممممممم

ممكن أسأل دلوقتي سؤال................انت قدوتك مين؟

و مش هخاف

هاقول كلام....كبييييييييييييييييييييييير

م الآخر.. ومن غير لف و دوران....هقول حاجه.....فكرت فيها كتير

و الآن لن اتردد

انا بحب نفسي قوي

انا معجب بنفسي اكيد

و فخور جدًا بيا

و بموت ف حاجه اسمها محمود أمين

و عندي ثقه بلا حدود فيا

حاسس ان في حاجات كتير عملتها بإرادتي و عزيمتي ..بفضل الله طبعا

و نجحت ف حاجات كتير بمجهودي ..بعد توفيق ربنا طبعا

و حاسس اني هاكون حاجه كبيره ف المستقبل.. ان شاء الله طبعا

و هاعمل حاجات كتيرتفيدني و تفيد الناس... ان شاء الله

و فرحان قوي ان انا لسه عايش و بكتب الكلام ده دلوقتي

و مبسوط قوي علشان بعبر عن اللي جوايا بحريه

و لتاني مره بقول انا حد كويس

ايوه انا حلو

ايوه انا ناجح

و فخور بكده

اوعى تفتح بقك بكلمه......لسه مخلصتش كلامي

بس مش مغرور

بس مش اناني

بس مش طماع

ولا حتى متعالي

و بسمع رأي الناس

و احترمه و افكر فيه

و احب اخدم الناس

باللي اقدر عليه

و اساعدهم كمان

لكن لا أقبل التدخل في خصوصياتي

و بقبل نقد الناس

و اغير من نفسي للأحسن

كان مبدأي ....بحب الحياه و بحب الناس

و دلوقتي و من غير خوف.....و كمان بقلب جامد

هاقول

بحب نفسي و بموت فيها

و فخور جدا ان انا...هو انا

ها ...كنت هتقول ايه

! ورقه وقلم ..كلاكيت تاني مره

بحب الحياه بحب الناس - محمود سعودي

الحقيقه الموضوع ده أنا كنت نشرته قبل كده من فتره طويله اوي ...بس حقيقي انا حبيته جداً خاصه ان فعلا الورقه و القلم مش مجرد شيئين موجودين في حياتي....أنا مضغوط جدا اليومين دول ومش عارف اكتب براحتي اليومين دول لكن ماقدرش أغيب عن المدونه وأكيد في ناس مشافتش الموضوع ده قبل كده...اسيبكم مع الموضوع

و بعد فترة ليست بالهينه قد قضيتها مع الكتابه ....يجب أن اعترف لكم عما بداخلي لتطلعوا على ما ضمر من أحاسيس و مشاعر.....لقد اصبح هناك عشق متوهج بيني و بين الورقه و القلم

بدايه أحب أن أشكر الأستاذ المحترم القدوة وسيدي و أستاذ الناس كلها اللي ملهوش كبير........الأستاذ "القلم"!!...محدش يستغرب لأنه فعلاً يستحق كل تقدير مع انه ثمنه رخيص بس معناه غالي قوي

القلم من وجهة نظري....هو القدوة التي يجب أن تحتذى في الطاعه و التضحيه..و يضرب بها المثل كمان

عارفين ليه؟؟

القلم فضل انه يعيش طول حياته أخرس و ماينطقش بـ ولا كلمه ف سبيل انه ترك لك الفرصه للحديث وقتما شئت وأينما شئت ..عمره ما فكر انه يعصيك ف يوم و يكتب حاجه انت مش عايزها... و برغم كده انت بتستغل طيبته و تسب الناس و تقول غير الحق

القلم عاش طول عمره خدامك مستعد ف أي لحظه انه يكتب أي حاجه انت عاوزها و برغم كده انت مش بتهتم بيه و ترميه ف أي حته

القلم مثال رائع في التضحيه و الفداء بدليل انه ممكن بل اكيد بيستغنى عن دمه و شريان حياته اللي هو الحبر و هو كل ما يملكه هذا الضعيف، يضحي به من اجل ان تكتب انت و يظل يضحي بدمه حتى آخر قطره تستطيع انت ان تكتب بها و في النهايه يكون المقابل من حضرتك انك تزهأ عليه و ترميه بعد ده كله!!! يعني هو ده مقابل العطاء و التضحيه ..كده.. ده بدل ما تبكي عليه، ولا عشان هو رخيص و في منه كتير...للأسف فقدنا قيم كثير لابد و حتماً و لزماً ان تعود

أما ورقتي الحبيبه فهي النموذج الذي يجب ان يضرب به المثل في الأمانه و الإخلاص!!! برضه اوعى تستغرب

فالورقه كانت في الأصل ميته وما ان سقاها القلم بدمه حتى عادت لها الروح من جديد ناطقة بحروف خطتها يداك .... و هي لا تكذب أبدا و لا تقول إلا الصدق و ليس لديها مكان تخبئ به كلماتك فهي واضحه أمام عينيك ليس هذا فحسب فإنها الشئ الوحيد الذي تستطيع ان تأتمنه على أسرارك لأنها لا تفتن.. زي ناس..الى جانب انها تحافظ على ما أودعتها من كلمات مهما طال العمر ومهما مر عليها من الزمن...... ولن تجرؤ على أن تضيعه أو تطلع عليه أحداً غيرك و لكن كالعاده في النهايه...لا يكون جزاؤها منك إلا انك تقطعها أو تحرقها بعد ما تنتهي هي من مهمتها....ده بدل ما تبروزها ...ده بدل ما تشكرها..انسان بجد عجيب...طب انت ترضى ان رئيسك بعد ما تنتهي من مهمتك انه يفصلك من الوظيفه على الأقل ....ده لو خصم منك يوم ....هتعمل ثوره

ولكن في النهايه التي اوضحت من نحن و من هم الساده العظام ... الورقه و القلم..اقول لقلمي و لورقتي ما تزعلوش و انا عارف ان انتو بتعملوا ده من غير مقابل و لكن في هنا واحد بيقدركوا و عارف قيمتوا كويس قوي و ناقم على الجنس البشري من أفعاله الوحشيه دي....الواحد ده هو ..أنا

بجد .... يا ريتني كنت ورقه ، يا ريتني أكون في يوم قلم

Introspection

Between phobia & Mania !!

AS usual there are many things you like....& also there are much more things you hate ,

BUT you will be so puzzelled when you are objected to something or a situation that you DON'T KNOW !!

Am I like ...or dislike it ?

THE more puzzling & much more stranger when you think about individually....

YOU will find yourself either fond of it...or extremely wanna avoid it !!!

-BUT STILL CAN'T MAKE A DECISSION-

I know what's it..........you know??

I'm sure that you know it , even at least you know it , but can't recognize!....JUST think deeply for seconds ..............can I help you ??

It's YOURSELF............"Myself???"

Yeah......don't be astonished & take it easy , I sware you must have felt that before,

WHEN you perform a good workin' & people like that & show their ADMIRATION ..sayin' good words........... OR, when you succeed , distinguishin' from others with a high degree ,

YOU feel yourself like a PEACOCK , proud of yourself wishin' NO one BUT you !!

BUT can you remember when you failed ...when you couldn't achieve your target .....you hate yourself ..not only , but also you wish IF EARTH CRACKS & SWALLOWS YOU.....being hidden from others eyes & afraid to face people BUT actually you are afraid of facin' YOURSELF !!

THIS is the human being........lost creatuers inspite of there is a BRAIN & despite of presence of HEART ....

ONE of us don't know if being a MODEL to be followed,,

OR being a LESSON to be avoided ....!!

NOW ...I think you have a distinct image about YOURSELF & it becomes well known..

THEN...I can say,,

BETWEEN PHOBIA & MANIA...

YOU WILL FIND ,,,,,,,

YOURSELF

حين تشاك.......في قلبك

أضيع نفسي و لا تضيع حاجتك ....يا أمي

حادث أليم ...مفجع ...كدت أن ابكي، بل كدت أن اموت....حادث غريب ، حين تجف دموعك ، فيبكي قلبك بدلاً منها دماً

ثلاث بنات صغيرين لم يتجاوز سنهن 6 سنين..راحوا...ماتوا خلاص ....ثلاث براعم قتلهن الإهمال و الامبالاه و في النهايه...عادي الله يرحمهم................أنا مش قادر اتكلم ..فعلاً عايز أحط دموعي على الورق وهي هتوصف أحسن مني

في مدينة العبور..في احدى المناطق السكنيه من أيام ،خرجت التلات بنات علشان يلعبوا، دنيتهم وردي ، و لم يرجعوا إلا غرقى مع انهم لم يذهبوا الى اي شاطئ بل انهم غرقوا بجانب البيت !!! ماتستغربش ، الحكايه و ما فيها انهم كانوا حافرين حفره بعمق 3 امتار بغرض تأسيس بناء ثم اكتشفوا ان تحت هذه الحفره مياه جوفيه فتركوها ولم يكملوا البناء حتى اصبحت مستنقع مائي عمقه 3 امتار

وبما انها مياه جوفيه... فإن منظرها نظيف و مغري و بالفعل دخل التلات بنات فيها و كان ما كان

لكن الشئ اللي قطع قلبي ، ان واحده منهم لما طلعوها وهي ميته و غرقانه..وجدوها لسه ماسكه جامد قوي بإيديها على خمسين قرش مامتها أو باباها كان اعطاها لها مع انها ماتت خلاص ..........مش عارف يمكن يكون عادي ..بس اثرت فيا قوي قوي ..وكأن البنت بتبعت رساله و عايزة تقول أنا هالعب و لو غلطت ممكن اضيع نفسي ...بس عمري ما هضيع واجبكم و جميلكم وفضلكم عليا.....................آآآآ

أنا مش قادر اكمل......بجد مش قادر أتكلم........حسبي الله و نعم الوكيل